Booliska Soomaaliya oo raadinaya askari ku kacay ‘khiyaano qaran’

[Deeq A.]

Muqdisho (Caasimada Online) – Taliska Ciidanka Booliska Soomaaliyeed, gaar ahaan qeybta gobolka Banaadir, ayaa baadi-goobaya Ex-Abaanduule Cabdirasaaq Cali Macallin, oo baxsad ka ah cadaaladda.

Ninkan oo hore uga tirsanaa Ciidanka Booliska Soomaaliyeed ayaa, sida uu sheegay talisku, loo haystaa dambiyo kala duwan, oo ay ka mid tahay inuu ku kacay “khiyaano qaran”, islamarkaana uu haatan baxsad yahay.

“Taliska Ciidanka Booliska Soomaaliyeed wuxuu bulshada Soomaaliyeed ku wargelinayaa in uu baxsad yahay Ex-Abaanduule Cabdirasaaq Cali Macallin, oo hore uga tirsanaa Ciidanka Booliska Soomaaliyeed, aana loo tixgelin xubin ka tirsan Ciidanka Booliska ama hay’adaha kale ee amniga,” ayaa lagu yiri qoraal kasoo baxay taliska.

Boolisku wuxuu bulshada ka codsaday in qof kasta oo arka ama hela xog ku saabsan eedeysanahan uu si degdeg ah ula wadaago saldhigga booliska ee ku dhow ama laamaha amniga.

“Eedeysanahan baxsadka ah oo galay dembiyo kala duwan, kuna kacay qiyaano qaran, waxaan ka codsanaynaa cid kasta oo aragta ama hesha xog ku saabsan oo sahli karta soo qabashadiisa in ay la wadaagto saldhigga booliska ee kuugu dhow ama ay wargeliso laamaha amniga,” ayaa lagu yiri qoraalka Taliska Ciidanka Booliska Soomaaliyeed.

Sidoo kale, Boolisku wuxuu caddeeyay in qofkii gacan ka geysta soo qabashada eedeysanaha uu heli doono abaalmarin qiimo leh.

Talisku ma shaacin nooca khiyaano qaran ee uu ku kacay abaanduulahan hore, balse wuxuu xaqiijiyay in baadi-goobkiisa lagu jiro si cadaaladda loo horkeeno.