Shiinaha oo Kordhinaya Saameyntiisa Dhaqaale iyo Gargaar Bani’aadamnimo ka bixitaankii Mareykanka

[Deeq A.]

Shiinaha ayaa si xowli ah ugu dhaqaaqaya qorshe uu kula wareegayo saameynta dhaqaale iyo gargaarka bani’aadamnimo ee uu horey u maamulayay Mareykanka, gaar ahaan mashaariicdii ay fulin jirtay hay’adda USAID.

Warbaahinta Bloomberg ayaa sheegtay in Shiinaha uu hadda bixinayo adeegyo iyo maalgelin cusub oo uu ku beddelayo kaalintii Mareykanka, taasoo sii xoojinaysa saameyntiisa caalamiga ah.

Si gaar ah, Shiinaha wuxuu diiradda saarayaa dalalka Aasiya, halkaasoo uu ku maalgelinayo barnaamijyadii USAID ee uu maamulka madaxweynihii hore Donald Trump hakiyay.

Hay’adda gargaarka caalamiga ah ee Shiinaha, oo loo yaqaan CIDCA (China International Development Cooperation Agency), ayaa si rasmi ah loogu wargeliyay dalalka ay saameeyeen isbeddelkan, taasoo muujinaysa in Shiinuhu uu si dhab ah u doonayo inuu buuxiyo booskii USAID ee gobolka.

Talaabadan waxay ka tarjumaysaa istiraatiijiyadda ballaaran ee Beijing ee ah inay si tartiib tartiib ah u xoojiso saamaynteeda caalamiga ah, iyadoo adeegsanaysa maalgelin iyo mashaariic horumarineed, gaar ahaan dalalka u nugul saameynta dhaqaale.

Waxay sidoo kale muujinaysay loolanka sii xoogeysanaya ee u dhexeeya Shiinaha iyo Mareykanka, xilli labada dal ay isku hayaan hoggaanka dhaqaale iyo siyaasadeed ee dunida.

Waxaa la filayaa in maalgelinta CIDCA ay door weyn ka ciyaarto horumarka kaabeyaasha dhaqaalaha ee dalalka Aasiya iyo Afrika, taasoo sii xoojin doonta xiriirka Shiinaha iyo waddamadaasi.

Source: goobjoog.com