Dowladda Mareykanka oo xalay duqeyn culus ku garaacday firxadkii argagixisada Daacish ee u baxsaday togga Miiraale

[Deeq A.]

Dowladda Puntland oo qoraal kooban soo saartay ayaa sheegtay in duqeyn diyaaradeed oo culus xalay lagu garaacay togga Miiraale ee buuraha Calmiskaad, halkaasi oo ay ku go’doonsan yihiin firxadkii dagaallamayaasha argagixisada Daacish ee baxsadka ah.

Bayaan ka soo baxay Xafiiska Warbaahinta u qaabilsan ciidamada difaaca dowladda Puntland ayuu ku xaqiijiyay duqeynta diyaaradeed ee xalay ka dhacday togga Miiraale, taasi oo ay fulisay dowladda Mareykanka islamarkaana lagu beegsaday firxadka mileeshiyaadka argagixisada Daacish ee ku go’doonsan toggaasi.

Ilo wareedyo amni oo ka tirsan Puntland ayaa sidoo kale sheegay in duqeyntaasi lala helay bartilmaameedyo sax ah, oo ay isku urursanayeen mileeshiyaadka Daacish, kuwaasi oo dhaca bartamaha togga Miiraale, halkaasi oo ay dhawaanahan sahan dhammaystiran ku sameeyeen diyaaradaha aan duuliyaha lahayn ee (Drones-ka).

Wararka ayaa sheegaya in dhawaqa duqeyntaasi oo ahayd mid aad culus laga maqlay degaanno masaafo dheer ka baxsan togga Miiraale, inkastoo aan weli xog faahfaahsan laga helin khasaaraha mileeshiyaadka Daacish ka soo gaaray duqeyntaasi

PUNTLAND POST

The post Dowladda Mareykanka oo xalay duqeyn culus ku garaacday firxadkii argagixisada Daacish ee u baxsaday togga Miiraale appeared first on Puntland Post.