DF oo beenisay inay dhul dheeraad ah siisay Galmudug kadib eedeyntii Puntland

[Deeq A.]

Muqdisho (Caasimada Online) – Dowladda Federaalka Soomaaliya ayaa beenisay inay dhul ballaarsi u sameysay maamulka Galmudug, kaddib markii Puntland ay ku eedeysay hay’adda diiwaan-gelinta iyo aqoonsiga qaranka (NIRA) inay deegaanno ka tirsan maamulka Puntland ku dartay Galmudug.

Bayaan kasoo baxay hay’adda NIRA ayaa lagu beeniyay eedeyntaas, iyadoo hay’addu caddeysay in aysan jirin meel ay deegaanno Puntland uga dartay dowlad-goboleedka Galmudug.

Waxay sidoo kale sheegtay in foomamka baraha bulshada ku baahay ee arrintan la xiriira ay yihiin been-abuur, kaas oo maamulka Garoowe usoo cuskaday eedeyntan.

“Hay’adda Aqoonsiga iyo Diiwaangelinta Qaranka (NIRA) waxay si cad u beeninaysaa eedaymaha la faafiyay ee la xiriira xarunta ay dhawaan ka furtay magaalada Gaalkacyo ee daanta Galmudug. NIRA waxay caddaynaysaa in foomka Baraha Bulshada lagu faafiyay uu yahay mid been-abuur ah; foomka rasmiga ah ee Hay’adda waxaa laga heli karaa website-keeda iyo xarumaheeda kala duwan,” ayaa lagu yiri bayaanka NIRA.

Waxaa kale oo lagu yiri bayaanka: “Ma jiro wax go’aan ah oo ay NIRA gaartay kaas oo deegaanno ka tirsan Puntland lagu hoos-geynayo Galmudug. Eedeymaha noocaan ah waa kuwo aan sal iyo raad toona lahayn, laguna marin-habaabinayo bulshada.”

Hay’adda NIRA ayaa hoosta ka xariiqday inay u hoggaansan tahay xuduudaha dastuuriga ah iyo nidaamka federaalka ee dalka, ayna ka go’an tahay in si cadaalad ah oo hufan loo gaarsiiyo dhammaan shacabka Soomaaliyeed adeegga kaarka aqoonsiga qaranka.

“NIRA waxay bulshada Soomaaliyeed u bayaaminaysaa inay deegaannada harsan ka hirgelin doonto Laamo rasmi ah oo loogu adeego shacabka, waxayna daadejinta adeeg-bixineed la kaashanaysaa dowladaha xubnaha ka ah dowladda federaalka.”

Maamulka Puntland ayaa maalmihii lasoo dhaafay eedeymo culus u jeedinayay dowladda federaalka Soomaaliya, kuwaas oo intooda badan ay dowladda dhexe iska fogeysay, taasi oo ugu dambeysay eedeyntii hay’adda NIRA u jeediyay guddoomiyaha gobolka Mudug ee Puntland.