Farmaajo oo bilaabay dhaq-dhaqaaq culus oo la xiriira doorashada dalka ee 2026

[Deeq A.]

Dooxa (Caasimada Online) – Madaxweynihii hore ee Soomaaliya, Mudane Maxamed Cabdullahi Maxamed (Farmaajo) oo haatan dibad-joog ah ayaa dalka Qatar ka bibaabay dhaq-dhaqaaqyo siyaasadeed oo la xiriira doorashooyinka soo socda ee 2026-ka.

Farmaajo oo ah Madaxweynihii 9-aad ee Jamhuuriyadda Federaalka Soomaaliya ayaa bilaabay kulamo uu la yeelanayo xildhibaannada, siyaasiyiina iyo waxgaradka, isaga oo kala hadlayo xaaladda siyaasadeed ee dalka, ammaanka iyo doorashooyinka soo socda.

Ujeedka ugu wayn ee kulamadan ayaa ah kuwa la xiriira qorshaha cusub ee Farmaajo, waana tallaabadii u horreysay ee uu qaadayo u diyaar garowga doorashada 2026.

Kulankii ugu dambeeyay oo Jimcihii shalay dhacay ayaa Maxamed Cabdullahi Farmaajo wuxuu la yeeshay Xildhibaan Cabdiladiif Muuse Nuur (Sanyare) oo ka tirsan golaha shacabka Soomaaliya, laga soo doorto Puntland, waxayna ka hadleen arrimo xasaasi ah.

Xildhibaanka oo qoraal soo saaray ayaa xog ka bixiyay wada-hadalka uu la yeeshay Farmaajo, wuxuuna tilmaamay inay ku yimaadeen kulamo is dabajoog ah oo ka dhacay Dooxa, ayna iska wareysteen qodobo muhiim ah, sida doorashada 2026, amniga iyo dagaalka argagixisada.

“Kulama isdaba joog ah oo aan yeelanay Madaxwayne hore Farmaajo, intii aan ku sugnaa magaalada Doha, waxaan iska waraysanay xaaladaha dalka, arimaha siyaasada, amniga, la dagaalanka argagixisada IS&AS, midnimada dalka iyo Arimaha doorashooyinka 2026” ayuu yiri Xildhibaan Cabdiladiif Muuse Nuur (Sanyare).

Sidoo kale wuxuu intaasi sii raaciyay in qodobada ay ka wada-hadleen ay isku fahmeen, taas oo ka dhigan inay yeelanayaan iskaashi siyaasadeed oo cusub, ka hor doorashda.

Xildhibaanka aya sidoo kale u mahaceliyay Farmaajo iyo kooxdiisa, oo uu tilmaamay inay si weyn oo mugleh ay ugu soo dhaweeyeen magaalada Dooxa ee caasimada dalka Qatar.

“Dhamaan qodabadas oo dhan waxaan ka noqonay isku aragti, waxaan aad ugu mahadcelinaya Madaxwayne farmajo iyo saaxiibadii kale igu soodhaweeyay Doha Qatar, intii aan joogay” ayuu mar kale yiri xildhibaanku.

Maxamed Cabdullaahi Farmaajo ayaa ka mid ah madaxdii hore ee dalka iyo siyaasiyiinta sida wayn u diidan qorshaha Villa Soomaaliya ee ku aadan qabashada doorasho qof iyo cod ah, taas oo ay ka taagan tahay dood weyn oo u dhexeysa Xasan iyo mucaaradka.

Si kastaba, waxaa haatan dalka uu ku jiraa marxalad siyaasadeed oo aad u culus oo ku aadan khilaafka ka dhashay doorashada iyo mid kale oo ku aadan dagaalka Al-Shabaab oo haatan xoogeystay, maadaama lagu arkay agagaarka Muqdisho iyo Shabeelooyinka.