Xogta DAGAAL sababay dhimasho iyo dhaawac oo maanta ka dhacay Garoowe

[Deeq A.]

Garoowe (Caasimada Online) – Warar dheeraad ah ayaa kasoo baxaya khasaaraha ka dhashay dagaal barqanimadii maanta ka dhacay gudaha magaalada Garoowe, xarunta gobolka Nugaal, kaas oo u dhexeeyay ciidamo ka wada tirsan kuwa maamulka Puntland.

Dagaalkan oo sababay dhimasho iyo dhaawac ayaa si gaar ah uga dhacay kantaroolka bari ee caasimadda Garoowe, wuxuuna dhexmaray ciidamada Booliska Puntland iyo ciidamo kale oo ka tirsan PSF, kuwaas oo ka yimid dhanka gobolka Bari.

Iska horimaadka oo socday muddo kooban ayaa sababay dhimashada illaa laba askari, halka ay dhaawacmeen afar kale, oo uu ku jiro taliyaha garoonka diyaaradaha Garoowe, sida ay Caasimada Online u xaqiijiyeen ilo-wareedyo lagu kalsoon yahay.

Wararka ayaa intaas ku daraya in dagaalka uu ka dhashay markii ciidamada Booliska ay isku dayeen inay ka reebaan baabuur dowladeed oo ay wateen ciidamada kasoo jeeda Bari, balse ay arrintaasi diideen, taasina ay keentay in is rasaaseyn ay bilaabato, taas oo sababtay khasaare labada dhinac ah.

Dhinaca kale, weli wax war ah kama soo bixin madaxda Puntland, gaar ahaan talisyada Booliska iyo PSF, oo ku saabsan dagaalka dhacay.

Xaaladda goobta lagu dagaalamay ayaa hadda deggan, waxaana dhaq-dhaqaaqii magaalada dib ugu soo laabtay sidii caadiga ahayd, iyadoo ay goobta ku sugan yihiin ciidamada Booliska Puntland.

Labadan ciidan ee ka wada tirsan Puntland ayaa horey isugu dhacay marar badan, waxaana la xasuustaa dagaalkii culusaa ee ka dhacay magaalada Boosaaso.

Dhacdadan ayaa kusoo beegmaysa, iyadoo Puntland ay haatan dagaal adag kula jirto kooxda Daacish, iyadoo ciidamadeeda ay isugu geeyeen aagga buuraha Calmiskaad, si dhulka buuraleyda ah looga xoreeyo kooxaha argagixisada ah.

Maamulka Puntland ayaa sheegay in ujeeddadoodu tahay in si degdeg ah lagu soo afjaro dagaalka ka dhanka ah Daacish, iyadoo lagu wado in howlgalka la soo gabagabeeyo ka hor ciidda bisha Ramadaan, si guud ahaan looga xoreeyo kooxdaasi deegaannada ay ku dhuumaaleysanayaan.

Tan iyo markii uu bilowday howlgalka, ciidamada Puntland ayaa ku dhaqaaqay dardar hor leh, waxaana la sheegay in muddo kooban lagu guuleystay in la maro saddex weji oo muhiim ah, iyadoo haatan la marayo wajigii ugu dambeeyay ee howlgalka, sida uu sheegay maamulka.