Madaxweyne Donald Trump oo saxiixay amar lagu xirayo…

[Deeq A.]

Washington (Caasimada Online) – Madaxweynaha Mareykanka, Donald Trump, ayaa saxiixay amar fulin ah oo lagu xirayo waaxda waxbarashada dalka.

Tallaabadan ayaa ka tarjumaysa ballan-qaadyadiisii ololaha doorashada iyo qorshe ay muddo dheer taageerayeen qaar ka mid ah muxaafidku.

Trump ayaa hay’addan ku eedeeyay xilkasnimo la’aan iyo in ay gabeen waajibaadkoodii, isaga oo ballan-qaaday in uu dib ugu celin doono dhaqaalaha ay maamusho gobollo gaar ah.

“Waxaan u xirayaa sida ugu dhaqsaha badan ee suurtagalka ah,” ayuu yiri, inkasta oo Aqalka Cad uu qiray in amarkan u baahan yahay go’aanka Congress-ka.

Caqabadaha sharci

Go’aankan ayaa durba wajahaya caqabado sharci ah, iyadoo dad badan oo ka soo horjeeda ay doonayaan in ay hor istaagaan xiritaanka hay’adda.

Waxa kale oo la diidan yahay dhimista shaqaalaha waaxda, taas oo la shaaciyay toddobaadkii hore.

Trump, oo carruur dhigata dugsiyada dalka ay hareera fadhiyaan xilli uu hadlayay Khamiistii, ayaa sheegay in Mareykanku uu bixiyo kharash aad u badan oo waxbarasho, marka loo eego waddamada kale, balse ay dhibcaha ardaydu aad u hooseeyaan.

In kasta oo amarkan uu la kulmi karo caqabado sharci, haddana Xisbiga Jamhuuriga oo Senate-ka ku leh aqlabiyad 53-47, ayaa u baahan ugu yaraan 60 cod si ay u ansixiyaan xiritaanka waaxda waxbarashada.