Dagaalka Calmiskaad oo la soo afjarayo ka hor Ciidda

[Deeq A.]

Garoowe (Caasimada Online) – Maamulka Puntland ayaa shaaciyay in ka hor Ciidda bisha Ramadaan ay soo afmeeri doonaan wejiga saddexaad ee dagaalka ka dhanka ah Daacish, kaasi oo ka socda buuraha Calmiskaad ee gobolka Bari.

Hoggaanka guud ee hawlgelinta ciidamada difaaca Puntland, S/Guuto Maxamed Aadan Jaamac (Degelle) oo la hadlay warbaahinta, ayaa sheegay in dagaalku u socdo sidii la qorsheeyay, islamarkaana la dhameystiri doono ka hor Ciidda.

“Hawlgalka Hillaac, oo taliska guud uu qorsheeyay in lagu qaado Ceelka Miiraale—meeshii ugu dambaysay ee ay ku harsanaayeen firxadka argagixisada Daacish—wuxuu u fulay sidii loo qorsheeyay, Ilaah baa mahad leh. Dhammaan qorshe kasta oo la diyaariyay waa fulay,” ayuu yiri hoggaanka ciidamada difaaca Puntland.

Waxa uu intaas ku daray: “Waxaa la burburiyay dhammaan difaacyadii ilaalada ee ku meersanaa Ceelka Miiraale, waxaana halkaasi ciidamadu ku dileen in ka badan 35 dagaallame oo ka tirsanaa argagixisada.”

Howl-galkan ayuu sheegay in ciidamadu kula wareegeen dhammaan talisyadii ku yaallay halkaasi, kuwaasoo haatan ay gacanta ku hayaan ciidamada difaaca Puntland.

“Wejiga saddexaad ee hawlgalka ayaa gebogebo ah, waxaana noo qorshaysan, Ilaahay idankii, in aan dhammaan sifayno meel kasta oo ay ku dhuumanayaan firxadka argagixisada inta aan Ciidda la gaarin,” ayuu yiri.

Waxa uu rajeeyay in inta dhiman howlgalka si guul ah lagu dhameystiri doono, iyadoo kooxda Daacish laga saaray inta badan dhulkii ay horey ugu sugnaayeen ee buuraha gobolka Bari.

Maamulka Puntland ayaa tan iyo markii uu bilaabay howlgalka ka dhanka ah Daacish waxay ciidamadu ku wadeen dardar horleh, iyadoo muddo kooban la iskaga gudbay saddex weji, kaasi oo haatan gebogebo maraya, sida uu sheegay maamulka.