Xamza oo qabtay kulan deg-deg ah oo amniga caasimadda – Maxaa soo kordhay?

[Deeq A.]

Muqdisho (Caasimada Online) – Ra’iisul Wasaaraha Xukuumadda Jahmuuriyadda Federaalka Soomaaliya, Xamza Cabdi Barre ayaa maanta shir-guddoomiyey kulan deg-deg ah oo looga hadlayo amniga caasimadda.

Kulankan ayaa sidoo kale waxaa looga hadlay amniga deegaannada ku xeeran caasimadda iyo howlgallada lagu ciribtirayo kooxaha argagixisada, oo haatan ka socda qeybo kamid ah dalka.

Ra’iisul Wasaaraha ayaa sheegay in xukuumaddiisa ay u guuri doonto furrimaha dagaalka lagu cirib-tirayo kooxda Al-Shabaab ee ku dhuumaaleysanaya qeybo kamid ah gobollada dalka.

Xamza ayaa sheegay in dadka Soomaaliyeed heystaan fursad muhiim ah oo waqti kooban lagu soo afjari doono kooxaha Khawaarijta ah, maadama ay ku jiraan marxalad dhammaad ah, lana doonayo in shacabka Soomaaliyeed gamcaha isu qabsadaan sidii ay qeyb uga noqon lahaayeen ilaalinta amnigooda iyo xasilloonida dalka.

Sidoo kale wuxuu faray hay’adaha amniga in ay sii xoojiyaan xaqiijinta amniga caasimadda, xilli lagu jiro tobankii dambe ee bisha barakeysan ee Ramadaan, ayna fooda nagu soo hayso Ciidda.

Kulanka ayaa ugu dambeyntiina lagu bogaadiyey howl-gallada socda ee ciidamada xoogga dalka iyo kuwa deegaanku ay kula jiraan Shabaab-ka baneystay dhiigga shacabka Soomaaliyeed ee laga sifeyn doono guud ahaan dalka.

Si kastaba, kulankan ayaa imanaya xilli shalay duleedka magaalada Muqdisho lagu arkay saacado kooban xubno Shabaab ah, oo sawirro iskaga qaaday iyaga oo baabuurta dadweynaha baaraya, taas oo kooxda dacaayad ahaan u baahisay, si ay u xoojiso baranbagaadada baraha bulshada.