DF Soomaaliya oo war kasoo saartay guusha weyn ee maanta gaareen ciidanka…

[Deeq A.]

Muqdisho (Caasimada Online) – Dowladda Federaalka Soomaaliya ayaa si weyn u soo dhaweysay guusha ay maanta gaareen Ciidamada Millateriga Suudaan oo xarumihii dowladda ee caasimadda Khartoum kala wareegey maleeshiyaadka RSF ee uu taageero Imaaraadka.

Ciidamada Suudaan ayaa goobaha ay maanta la wareegeen waxaa kamid ah qasriga Madaxtooyadda ee Khartoum oo ku yaalla bartamaha magaaladaasi, oo ay ku sugnaayeen maleeshiyaadka RSF.

Bayaan kasoo baxay Wasaaradda Arrimaha Dibadda ee Soomaaliya oo ku qornaa luuqada Carabiga ayaa lagu muujiyay sida ay dowladda Soomaaliya ula dhacsan tahay wixii maanta dhacay iyo guusha taariikhiga ah ee gaareen ciidamada Suudaan.

“Soomaaliya waxay la dhacsan tahay naf-hurnimada walaalaha Suudaan, shacabka iyo ciidan. Waxaan si adag u taageeraynaa midnimada, wadajirka iyo in aad xasilooni qaran, horumar iyo barwaaqo gaadhaan,” ayaa lagu yiri bayaanka dowladda.

Hoos ka aqriso bayaanka

Jamhuuriyadda Federaalka Soomaaliya waxay si weyn ugu faraxsan tahay dib u soo celinta ciidamada qalabka sida ee Suudaan ee qabsaday Qasriga Jamhuuriyadda oo ku yaal caasimadda Khartuum, kadib laba sano oo dagaal hubeysan ah.

Tani waa tallaabo muhiim ah oo lagu ilaalinayo madax-bannaanida Suudaan iyo xoojinta nabadda iyo ammaanka.

Sidoo kale, Jamhuuriyadda Federaalka Soomaaliya waxay si dhow ula socotaa dedaalka geesinimada leh ee shacabka walaalaha ah ee Suudaan iyo ciidamada qalabka sida.

Soomaaliya waxay mar kale xaqiijinaysaa mowqifkeeda taariikhiga ah ee ah taageerada midnimada, madax-bannaanida Suudaan, iyo kaalmaynta hay’adaha sharciga ah si loo xaqiijiyo xasilloonida, amniga, iyo isku-duubnida qaranka.

Iyadoo lagu jiro habeenada barakaysan ee tobanka ugu dambeeya ee bisha Ramadaan, waxaan Ilaahay ka baryeynaa in uu Suudaan ku manaysto nabad iyo xasillooni, islamarkaana dadaalka shacabka walaalaha ah ee Suudaan uu keeno horumar iyo barwaaqo.