Minnesota: Saalim Saciid iyo Aimee Bock oo lagu helay xatooyo la xiriirta $250 milyan

[Deeq A.]

Minneapolis (Caasimada Online) – Xeer-beegti ayaa xukun ku riday Aimee Bock iyo Salim Said oo lagu helay dhammaan dambiyada lagu soo oogay, kadib markii lagu eedeeyay musuq-maasuq dhan $250 milyan oo lagu fuliyay magaca quudin carruurta Minnesota intii lagu jiray xilliggii COVID-19

Xeer-beegtida maxkamadda federaalka ayaa Arbacadii dambiyada oo dhan ku heshay Aimee Bock iyo Salim Said, kuwaas oo lagu eedeeyay inay abaabuleen khiyaano lacageed oo baaxad leh oo lagu lunsaday $250 milyan, iyadoo la sheegtay in lacagahaas loogu talagalay quudinta carruurta Minnesota xilligii uu socday cudurka saf-marka ahaa ee COVID-19.

Bock, oo 44 jir ah, ahna aasaasaha iyo agaasimaha hay’adda Feeding Our Future, iyo Said, oo 36 jir ah kana mid ah milkiilayaasha maqaayadda Safari, ayaa si degdeg ah loo xiray kaddib xukunka, iyadoo laga baqay inay baxsadaan ka hor inta aan la ridin xukunka muddada xabsiga.

Garsooraha maxkamadda federaalka, Nancy Brasel, ayaa ku adkeysatay go’aankeeda ah in la xiro, iyadoo tiri: “Labadan eedeysane waxay muujiyeen dabeecado been-abuur iyo marin-habaabin ah intii uu socday maxkamadda,” waxayna intaas ku dartay inay ka cabsi qabto inay wax ka beddelaan dokumentiyo ama ay isku dayaan inay ka baxsadaan caddaaladda.

Bock ayaa lagu helay toddobo dacwadood, oo ay ku jiraan khiyaano lacag wraeejin (wire fraud), maleegis khiyaano, iyo musuq-maasuq la xiriira barnaamijyada dowladda federaalka.

Said waxaa lagu helay 21 dacwadood oo dheeraad ah, oo ay ku jiraan lacag-dhaqid iyo shirqool ku saabsan been xalaaleynta lacagaha la lunsaday.

Dacwad-oogayaashu waxay ku eedeeyeen Bock inay ahayd maskaxdii ka dambeysay khiyaanada, iyada oo si been abuur ah u sheegtay tirada cuntada la bixiyay iyo isticmaalka lacagaha federaalka ee loogu talagalay barnaamijyo cunto si xad dhaaf ah loo buunbuuniyay ama aan jirin xilligii COVID-19.

“Kiiskan wuxuu calaamad u noqday dhibaatada musuq-maasuqa ee ka jirta gobolka,” ayuu yiri Kaaliyaha Xeer Ilaaliyaha Federaalka Joe Thompson, isagoo ku tilmaamay qorshahan “mid aad u foojigan” iyo “ceebta gobolka Minnesota.”

Xeer-beegtida ayaa xukunka gaartay kadib ku dhowaad shan saacadood oo wadatashi ah, taasoo dhammaysay dacwad socotay in ka badan shan toddobaad, oo ay markhaati ka ahaayeen wakiillo ka tirsan FBI, xisaabiyayaal baarayaal ah, iyo dad is-dhiibay oo qirtay inay qayb ka ahaayeen khiyaanada.

Labada eedeysane ayaa markhaati ka bixiyay difaacooda, iyadoo hadalladoodu si toos ah ugu liddi ahaayeen caddeymaha iyo markhaatiga ay soo bandhigeen dacwad-oogayaasha.

Markhaatiyaal ayaa ku sifeeyay Bock qof saameyn weyn leh oo aan la taaban karin, iyadoo mid ka mid ah markhaatiyaasha uu ku tilmaamay “ilaah,” taasoo muujinaysay doorkeeda weyn ee fulinta khiyaanada.

Dacwad-oogayaashu waxay soo bandhigeen caddeymo muuqaal ah oo si cad uga hor imanayay sheegashada Said ee ahayd in maqaayaddiisa Safari ay si maalinle ah ugu adeegto kumannaan cunto ah.

Qareennada difaaca ayaa ku dooday in macaamiishoodu ay ahaayeen dad lagu qaldamay ama lagu khiyaaneeyay la-hawlgalayaashooda, islamarkaana aysan ogayn baaxadda khiyaanada dhacday. Intii la akhrinayay xukunka, waxaa muuqday falcelinno dareen leh, iyadoo Bock ay ilmaysay markii gacanta lagu dhigay.

Intii ay dacwadu socotay, dacwad-oogayaasha ayaa soo bandhigay caddeymo xoog leh, oo ay ku jiraan muuqaallo ka yimid maqaayadda Safari, kuwaas oo si cad u beeninayay sheegashada Said.

Maqaayaddiisu waxay horay u samayn jirtay qiyaastii $600,000 sanadkii, balse waxay sheegtay inay adeegto 3.9 milyan oo cuntooyin ah intii u dhaxaysay Abriil 2020 iyo Noofambar 2021, taasoo sababtay in malaayiin doolar oo magdhow been abuur ah ay ugu wareegto guryo raaxo leh, gaadiid iyo safarro dibadda ah.

Qareennada difaaca ayaa weli ku andacoonaya in eedeysanayaashu ay ahaayeen dad lagu khalday ama laga faa’iidaystay. Kenneth Udoibok, oo ah qareenka Bock, ayaa muujiyay niyad-jab ku saabsan sida xukunka si dhaqso ah lagu gaaray, isagoo sheegay inuu qorsheynayo rafcaan.

“Ugu yaraan waxay heshay fursad ay sheekadeeda ku sheegto,” ayuu yiri Udoibok, isagoo tixraacaya markhaatigeedii muranka dhaliyay, halkaasoo ay ku qiratay in khiyaano dhacday balse ay sheegtay inaanay ogeyn faahfaahinta.

Guddoomiyaha gobolka Minnesota Tim Walz ayaa soo dhaweeyay xukunka, isagoo si adag u cambaareeyay in barnaamij loogu talagalay carruurta baahan la khiyaaneeyay. “Kuwani waa dambiyayaal ka faa’iidaystay nidaamka,” ayuu yiri Walz. “Waxay u shaqeynayeen si abaabulan, waxayna sii wadeen beenta.”

Dacwadda Feeding Our Future waxaa lagu soo oogay 70 qof, waxaana 44 kamid ah la xukumay iyagoo qirtay dambiyada ama lagu helay maxkamad. Mas’uuliyiinta ayaa dib u soo ceshaday qiyaastii $60 milyan oo ka mid ah lacagihii la lunsaday, iyadoo dacwado kale ay socdaan.

Taariikhda rasmiga ah ee xukunka Bock iyo Said weli lama shaacin, hase yeeshee dacwad-oogayaasha waxay filayaan in lagu xukumo xabsi dheer.

“Waxaan rajaynaynaa in xukunka maanta uu astaan u noqdo bog cusub,” ayuu yiri Thompson, isagoo muujiyay in Minnesota ay ka go’an tahay soo celinta daahfurnaanta barnaamijyada dadweynaha.