Weerar culus oo caawa Jilib ka socda iyo Xamza oo furimaha dagaalka u guuraya

[Deeq A.]

Muqdisho (Caasimada Online) – Warar hordhac ah ayaa laga helayaa duqeymo caawa gilgilay magaalada Jilib ee gobolka Jubbada Dhexe, halkaas oo ay dul wareegayaan diyaaradaha dagaalka ee Soomaaliya iyo kuwa caalamka.

Dhowr goobood ayaa lasoo sheegayaa in la bartilmaameedsaday, anteelada ama isgaarsiinta ayaa hawada laga saaray, waxaana Jilib ka bilowday duqeymo xoog leh iyo kala carar afurkii kadib.

Weli lama xaqiijin bartilmaameedka oo dowladda Soomaaliya oo weerarkaan qaaday kama aysan hadlin, balse xogtu waxay sheegeysaa in ilaa shan xarumood la beegsaday, magaaladuna gashay Bandow iskeed ah.

Jilib waa xarunta Al-Shabaab, waa magaalo ka fug dhulka ay ka dagaalamayaan ciidamada Soomaaliya, balse toddobaadkaan gudihiisa waa markii labaad oo duqeymo culus ay ka fulisay dowladda Soomaaliya.

Dagaallada ka socda Soomaaliya ee dowladda iyo kooxaha argagixisada ah u dhaxeysa ayaa sii xoogeysanaya maalin kasta, Al-Shabaab waxay wadaan weerarro is dabajoog ah, dowladana waxaa ka go’an in waqti kooban ay ku soo afjarto kooxdaan.

Xukuumadda Ra’iisul Wassaare Xamza ayaa maanta go’aan culus ku dhawaaqday, waxayna u guureysaa furimaha dagaalka, sida looga dhawaaqay shir deg deg ah oo maanta ay isugu yimaadeen golaha wasiirrada.

Madaxweynaha Soomaaliya ayaa la wareegay hoggaaminta dagaalka, toddobaadkaan ayuu dib u xirtay tuutihiisa, wuxuuna isku maray seddax degmo oo ka tirsan Shabeellaha Dhexe.

Degmada Cadale ee gobolka Shabeellaha Dhexe oo ah magaalo xeebta badweynta Hindiya saaran ayuu Xasan Sheekh degay, waxaana heegan la geliyey dhamaan qeymaha kala duwan ee ciidamada qaranka waxaana la isugu geeyey Shabeellaha Dhexe, gaar ahaan aagga Cadale.

Degmada Aadan-Yabaal oo hadda ah difaaca ugu dambeeya ee ciidamada dowladda waxaa maanta gaaray gurmad culus oo ka yimid Hiiraan, kuwaas oo xoojinaya dagaalka Al-Shabaab ee la qorsheynayo in la Dardar geliyo toddobaadkaan bilaabanaya.

Xog ay heshay Caasimada Online ayaa sheegeysa in Madaxweyne Xasan Sheekh oo dagaalka hoggaaminaya uu ku haminayo in ciidda ka hor Shabeellaha Dhexe laga saaro kooxda Al-Shabaab oo culeys badan soo saartay gobolkaas.