Sawirro: Xasan Sheekh oo kulamo ka wada Cadale iyo xogta qorshaha socda

[Deeq A.]

Muqdisho (Caasimada Online) – Madaxweyne Xasan Sheekh Maxamuud oo habeenkii 2-aad ku hoyanaya degmada Cadale ee gobolka Shabeellaha Dhexe ayaa halkaas kulamo gaar-gaar ah kula qaatay masuuliyiinta odeyaasha iyo waxgaradka ka soo jeeda gobolkaas.

Madaxweynaha iyo odeyaasha uu la kulmay ayaa adkeeyey muhiimadda ay leedahay garab istaagga Ciidamada Qaranka Soomaaliyeed ee u taagan xoreynta deegaannada ay ku harsan yihiin kooxaha argagixisada ah.

Odayaasha, siyaasiyiinta iyo saraakiisha ka soo jeeda Shabeellaha Dhexe ayaa ku bogaadiyey Madaxweynaha sida ay uga go’an tahay dardar gelinta howlgalka ka dhanka ah argagixisada ee HirShabeelle ka socda.

Guddoomiyaha Gobolka Shabeellaha Dhexe, guddoomiyihii hore ee gobolkaas, guddoomiyaha degmadfa Yaaqshiid ee Muqdisho, saraakiil ciidan iyo masuuliyiin kale ayaa kasoo muuqday kulankii ugu dambeeyey.

Shalay waxaa Madaxweynaha Cadale uga dabategay odayaasha dhaqanka Mudullood oo Ugaas Maxamuud Cali Ugaas uu hoggaaminayo, waxaana Cadale ka socda abaabul dagaal oo xoog leh, kaas oo la qorsheynayo in toddobaadkaan natiijo laga gaaro.

Xog ay heshay Caasimada Online ayaa sheegeysa in Madaxweyne Xasan Sheekh oo dagaalka hoggaaminaya uu ku haminayo in ciidda ka hor Shabeellaha Dhexe laga saaro kooxda Al-Shabaab oo culeys badan soo saartay gobolkaas

Degmada Aadan-Yabaal oo hadda ah difaaca ugu dambeeya ee ciidamada dowladda waxaa maanta gaaray gurmad culus oo ka yimid Hiiraan, kuwaas oo xoojinaya dagaalka Al-Shabaab ee la qorsheynayo in la Dardar geliyo toddobaadkaan bilaabanaya.

Dagaallada ka socda Soomaaliya ee dowladda iyo kooxaha argagixisada ah u dhaxeysa ayaa sii xoogeysanaya maalin kasta, Al-Shabaab waxay wadaan weerarro is dabajoog ah, dowladana waxaa ka go’an in waqti kooban ay ku soo afjarto kooxdaan.

Xukuumadda Ra’iisul Wassaare Xamsa ayaa maanta go’aan culus ku dhawaaqday, waxayna u guureysaa furimaha dagaalka, sida looga dhawaaqay shir deg deg ah oo maanta ay isugu yimaadeen golaha wasiirrada.