DF oo si qarsoodi ah ciidan uga qoraneysa Puntland

[Deeq A.]

Garoowe (Caasimada Online) – Dowladda federaalka Soomaaliya ayaa si qarsoodi ah ciidamo uga qoraneysa deegaanada maamulka Puntland, sida uu shaaciyay maamulka.

Puntland oo markii ugu horreysay shaaca ka qaaday arrintan, ayaa sheegtay in dowladda dhexe ay dhalinyarada reer Puntland u qoraneyso, si ay ugu biiriso ciidamadeeda looguna adeegsado dagaalka ay kula jirto Al-Shabaab.

Wasiirka Warfaafinta Puntland, Maxamuud Caydiid Dirir oo ka hadlayay arrintan, ayaa sheegay in magaalada Boosaaso lagu qabtay siddeed dhallinyaro ah oo la ogaaday in si dhuumaaleysi ah looga dhoofinayay magaalada, kuwaas oo la sheegay inay u socdeen dowladda federaalka.

Wasiirka ayaa intaas ku daray in dowladda federaalka ay dhalinyaradan ku wado qorshe la’aan, si ay ugu dirto furimaha dagaalka, iyadoo loogu sheekeeyay warar been ah oo la xiriira inay ka shaqeynayaan doorashooyinka qof iyo cod, sida uu sheegay.

“Dhallinyarada reer Puntland ha ka feejignaadaan qorshahaan,” ayuu yiri wasiirka, oo dhallinyarada maamulka ugu baaqay inay joogaan deegaannadooda, si aysan ugu dhicin dabinka dagaal aan loo meel dayin.

Hadalkan ka soo baxay maamulka Puntland ayaa imaanaya xilli warar soo baxay maalmo ka hor ay sheegayaan in dowladda federaalka ay ciidamo ka qorayso magaalooyinka Garoowe, Gaalkacyo iyo Boosaaso.

Maamulka Puntland iyo dowladda dhexe ayaa si weyn usii kala fogaaday kadib khilaaf siyaasadeed shaqsi ah oo soo dhex galay labada mas’uul ee ugu sarreeya labada dhinac, taasoo keentay in gebi ahaanba meesha ka baxdo wada-shaqeyntii labada heer dowladeed.