Sawirro: Al-Shabaab sitay bacda duqeynta looga dhuunto iyo saraakiil sare oo lagu dilay…

[Deeq A.]

Al-kowsar (Caasimada Online) – Ciidamada Macawiisleyda degmada Al-Kowsar ayaa maanta jidka u galay oo dilay labo nin oo ka tirsan Al-Shabaab, kuwaas oo watay Bacda looga dhuunto duqeymaha, Mooto iyo labo qori oo AK47 ah.

Ciidamada ayaa soo bandhigay meydadka raggii ay howlgalkaas ku dileen iyo dhamaan wixii ay wateen oo ay ka furteen, waxayna balan ku qadeen in Shabaab-ka soo galay dhulkooda ay sidaan u ugaarsa doonaan ilaa ay ka dhamaadaan.

Howlgalkaas ayaa maanta ka dhacay deegaanka Gal-haruur oo hoos taga Degmada Al-kowsar, waxaana la ogaaday in kooxdu ay heysato Bacda looga dhiinto duqeymaha diyaaradaha, maadaama ragaan la dilay ay siteen.

Dowladda federaalka iyo xaq u dirirka dadka deegaanka ayaa kordhiyey weerarrada gaadmada ah iyo duqeymaha loo geysanayo kooxda Al-Shabaab, iyadoo maanta mar kale deegaan hoos taga Ceelbuur lagu duqeeyey saraakiil Shabaab ah.

Howlgal duqeyn ah oo maanta ka dhacay deegaanka Dabdheer oo u dhaxeeya degmada Ceelbuur iyo deegaanka Ceelgaras ee gobolka Galgaduud ayaa lagu laayay horjoogayaal ka tirsanaa Khawaarijta oo ku sugnaa guri halkaasi ku yaalla.

Xubno ka soo waramay deegaanka ayaa sheegay in howlgalkaas lagu dilay saraakiishii Al-Shabaab ee la beegsaday, inkastoo aan magacyada, tirada ragga la dilay iyo xogtooda rasmiga ah aan weli la baahin, hadana waxay wararka hordhaca ah sheegayaan in maanta halkaas kooxda looga dilay saraakiil sare oo muddo lagu raad-joogay.

Howlgalladaan is dabajoogga ah waxay ku soo aadayaan, iyadoo maanta Madaxweyne Xasan Sheekh uu ka degay degmada Cadale ee gobolka Sh/Dhexe, halkaas oo abaabul dagaal kii ugu cuslaa uu ka socdo.

Deegaanada Sumadaale, Bursha Sheekh, Basra, Ceelbaraf, Galcad, Gal-haruur, Sabiib iyo deegaano kale oo kooxda Al-Shabaab lagu bartilmaameedsaday ayey xalay ilaa maanta garaacayeen diyaaradaha dagaalka ee dowladda Soomaaliya iyo caalamka.