Daawo: Dhaqanka beesha Mudullood oo ku biiray dagaalka – Maxaa ka socda Sh/Dhexe?

[Deeq A.]

Muqdisho (Caasimada Online) – Odayaasha dhaqanka beelaha Mudullood ayaa ku biiray abaabulka dagaalka Khawaarijta, waxayna galabta ka baxeen magaalada Muqdisho, iyagoo gaaray deegaano ay ugu horeyso degmada Cadale oo abaabulka ugu culus uu ka socdo.

Ugaaska beelaha Mudullood Ugaas Maxamuud Cali Ugaas ayaa hoggaminaya wafdiga odayaasha ah ee galabta garay degmada Cadale, sidoo kale xildhibaano iyo siyaasiyiin horay xilal kala duwan dalka uga soo qabtay ayaa qeyb ka ah wafdiga.

Kadib muddo dheer oo dhaqanka Mudullood la is weydiinayey sababta ay uga qeyb qaada la’yihiin howlgalka, waxaa hadda bilowday abaabul ay hor kacayaan oo saldhigiisu yahay degmada Cadale, halkaas oo ciidamadii ugu badnaa ee dowladda la isugu geeyey.

Madaxweyne Xasan Sheekh ayaa wafdiga odayaasha Mudullood uga sii horeeyey degamada Cadale, waxaana la sheegay in Madaxweynuhu degay oo halkaas uu ka hoggaami doono dagaalka Khawaarijta.

Sidoo kale, Madaxweynaha maamulka HirShabeelle Cali Guudlaawe ayaa ka Madaxweyne Xasan Sheekh ku soo dhaweeyey degmada Cadale, halkaas waxaa ku sugan dhammaan saraakiisha muhiimka ah ee ciidamada qaranka.

Abaabulka xooggan ee ka socda Cadale ayaa barbar socda howlgallo culus oo ciidamada dowladda iyo kuwa deegaanka oo is garabsanaya ay ku bilaabeen Al-Shabaab, iyadoo la adeegsanayo xeeladihii kooxdu ku beegsan jirtay ciidamada.

Dowladda federaalka iyo xaq u dirirka dadka deegaanka ayaa kordhiyey weerarrada gaadmada ah iyo duqeymaha loo geysanayo kooxda Al-Shabaab, iyadoo maanta mar kale deegaan hoos taga Ceelbuur lagu duqeeyey saraakiil Shabaab ah.

Ciidamada Macawiisleyda degmada Al-Kowsar ayaa maanta jidka u galay oo dilay labo nin oo ka tirsan Al-Shabaab, kuwaas oo watay Bacda looga dhuunto duqeymaha, Mooto iyo labo qori oo AK47 ah.

Howlgal kale oo duqeyn ah oo maanta ka dhacay deegaanka Dabdheer oo u dhaxeeya degmada Ceelbuur iyo deegaanka Ceelgaras ee gobolka Galgaduud ayaa lagu laayay horjoogayaal ka tirsanaa Khawaarijta oo ku sugnaa guri halkaasi ku yaalla.

Xubno ka soo waramay deegaanka ayaa sheegay in howlgalkaas lagu dilay saraakiishii Al-Shabaab ee la beegsaday, inkastoo aan magacyada, tirada ragga la dilay iyo xogtooda rasmiga ah aan weli la baahin, hadana waxay wararka hordhaca ah sheegayaan in maanta halkaas kooxda looga dilay saraakiil sare oo muddo lagu raad-joogay.

Deegaanada Sumadaale, Bursha Sheekh, Basra, Ceelbaraf, Galcad, Gal-haruur, Sabiib iyo deegaano kale oo kooxda Al-Shabaab lagu bartilmaameedsaday ayey xalay ilaa maanta garaacayeen diyaaradaha dagaalka ee dowladda Soomaaliya iyo caalamka.

Hoos ka daawo wafdiga beelaha Mudullood