Sawirro: Xasan Sheekh oo ku hoyanaya furimaha dagaalka iyo xogta qorshaha socda

[Deeq A.]

Moqokori (Caasimada Online) –Madaxweynaha Jamhuuriyadda Federaalka Soomaaliya Mudane Xasan Sheekh Maxamuud oo ku hoyanaya jiidaha hore ee dagaalka ka dhanka ah argagixisada ayaa caawa kulan kula qaatay degmada Moqokori Hoggaanka Hirshabeelle iyo saraakiisha ciidamada hormuudka u ah howlgallada xoreynta dalka.

Madaxweynaha ayaa ka xogwareystay Madaxweyne ku xigeenka Hirshabeelle iyo Hoggaanka Ciidamada jiidda hore, guulaha iyo caqabadaha jira, iyagoo soo bandhigay sida ay ciidamada u dhiirri-gelinayso in Madaxweynihii Qaranka uu kula sugan yahay furinta dagaalka, si dhowna ula socdo guulaha, baahiyaha iyo geesinimada Ciidanka Soomaaliyeed.

Madaxweyne Xasan Sheekh oo maanta Muqdisho ka ambabaxay ayaa isku maray degmooyinka Aadan-yabaal oo Sh/Dhexe ah iyo Moqokori oo Hiiraan ka tirsan, waxaana kolonyadiisa lagu qarxiyey Muqdisho, intii uu u sii socday garoonka.

Madaxweynaha ayaa gaaray jiidaha hore ee dagaalka ayaa qorsheynaya in maalmaha soo socda uu deegaanada HirShabeelle ka hoggaamiyo hawlgallada xoreynta deegaannada ay Al-Shabaab soo galeen toddobaadyadii lasoo dhaafay.

Madaxweynaha ayaa u kuur-galay maanta xaaladda ciidamadii iyo xoogaggii shacbiga ee uu la kulmay kuwaas oo u istaagay xoreynta deegaannadooda, isagoo warbixinno ka dhegeystay talisyada iyo hoggaannada ku sugan furimaha dagaalka,.

“Dowladda Federaalka Soomaaliya waxay bogaadinaysaa baraarugga dhallinyarada Soomaaliyeed, haweenka, waxgaradka iyo culimada ee ka dhanka ah argagixisada dhibaatada ku haysa dalkeenna, gaar ahaan taageerada halyeeyada Ciidamada Qaranka ee naftooda u huraya qarannimada iyo gobanida dalkeenna,” ayaa lagu yiri qoraal maanta kasoo baxay Villa Somalia.

Madaxweynaha ayaa la qorsheeyey in Khamiista uu dego magaalada Cadale, halkaas ayuu ka hoggaami doonaa dagaalka Khawaarijta, waxaana howlgallada loo badinayaa dhanka duqeymaha.

Diyaaradaha dagaalka ee casriga ee AKINCI-TB3 oo Turkigu farsameeyo ayaa maanta laga soo dejiyey Muqdisho, kuwaas oo maalmaha soo socda ka qeyb qaada doona dumeymaha Al-Shabaab, siyaaradahaan waxaa la sheegay in milkiyadooda ay leedahay dowladda Soomaaliya.