Xogta dagaal culus oo xalay ka soo bilowday Awdheegle – Yaa caawa heysta magaalada?

[Deeq A.]

Awdheegle (Caasimadda Online) – Faahfaahino dheeraad ah ayaa ka soo baxaya dagaal culus oo saaka salaaddii subax ka soo billowday degmada Awdheegle ee gobolka Shabeellaha Hoose, dagaalka ayaa soo gaaray caawa fiidkii, waxaana dhacay khasaare culus.

Kooxda Al-Shabaab waxaa maanta u suurtagashay inay gudaha u galaan degmada Awdheegle, iyagoo u dagaalamay si aan horay loo arag.

Hal urur oo ka tirsan ciidanka Gorgor ayaa kula dagaalamay magaalada, waxaa subixii horaba dagaalka ku dhintay Taliyihii ururka, is difaac badan kadib ciidamadu waxay sameeyeen dib u gurasho.

Goobjoogayaal ku sugan Awdheegle ayaa Caasimadda Online u sheegay inay arkeen meydadka Shabaab tiro beel ah oo dagaalka lagu dilay, kuwaas oo yaalla luuq kasta.

Ugu yaraan afar muuqaal duube oo Shabaab ah ayaa la sheegay in maanta Ciidamada Dowladda ay ku dileen dagaalka Awdheegle.

Khasaaraha gaaray ciidanka waa yaraa, Maxamed Tawane Ciilow oo ahaa weriyihii ururka Gorgor ee Shabaab kula dagaalamay Awdheegle ayaan kamid ahaa askarta lagu dilay dagaalka.

Diyaaradaha dagaalka ayaa maanta duhurkii ku biiray dagaalka, iyagoo duqeeyey kooxda Al-Shabaab, inkastoo ay ka bixi diideen magaalada, iyagoo ka cabsanaya in diyaaraduhu duurka ku laayaan.

Ciidamo kasoo gurmaday Shabeellaha Dhexe oo uu hoggaaminayo Taliyaha guutada 14-ka Oktoober Nuur Farey iyo kuwo ka baxay Muqdisho ayaa galabta gurmad ahaan u tegay Awdheegle, waxaana la xoojiyey dagaalka tooska ah, si Shabaab-ka looga saaro magaalada, looguna duqeeyo banaanka.

Dagaal culus kadib, waxaa kooxda la isugu geeyey xaafadaha ugu dambeeya magaalada, waxaana dhacay qorraxda oo habeen ayaa la galay, iyadoo hadafku yahay in kooxda laga saaro magaalada, si loogu duqeeyo duleedka.

Kooxda Al-Shabaab ayaa shaacisay inay xabsiga Awdheegle kala baxeen Yacquub oo ahaa horjoogihii u qaabilsanaa deegaanka Mubaarak, kaas oo shalay galab isku soo dhiibay ciidamada qaranka ee ku sugan Awdheegle, iyagoo ku tilmaamay ‘mid ayaan daran.’

Qorshaha dowladda waa in Shabaab la duqeeyo markii ay ka baxaan magaalada Awdheegle, halka iyaguna ay ka baqayaan taas, maadaama diyaaradaha dagaalka ay dul wareegayaan magaalada oo caawa ku jirta xaalad colaadeed.

The post Xogta dagaal culus oo xalay ka soo bilowday Awdheegle – Yaa caawa heysta magaalada? appeared first on Caasimada Online.