Xog xasaasi ah: Al-Shabaab oo caawa soo galay Ceelasha Biyaha – Maxaa ka socda dalka?

[Deeq A.]

Muqdisho (Caasimadda Online) – Kooxda Al-Shabaab ayaa caawa isku fidisay deegaannada u dhexeeya Muqdisho iyo Afgooye, iyagoo gudaha u galay deegaanka Ceelasha Biyaha ee duleedka magaalada Muqdisho, halkaas oo dhaqdhaqaaqyo culus ay ka wadaan.

Goobjoogayaal ku sugan Ceelasha Biyaha ayaa Caasimadda Online u sheegay in caawa Afurkii kadib ay Shabaab soo galeen deegaanka, iyagoo isku fidiyey xaafadaha deegaanka Ceelasha Biyaha.

Waxay demiyeen layrarkii ku xirnaa jidadka waaweyn ee deegaanka, waxay dadka u sheegayeen inay si nabad ah ku joogaan deegaanka, mana jirin wax iska caabin ah oo ciidamada dowladda ay kala kulmeen.

Ciidamada dowladda ayaa difaac ka xirtay xeryaha ay ka degan yihiin deegaanka Ceelasha Biyaha, halka Al-Shabaab ay dhex-roondaynayaan xaafadaha magaalada.

Sidoo kale, Ciidamadii ku sugnaa baraha koontaroollada ayaa isugu soo aruuray saldhigga weyn ee Siinka Dheer oo u dhexeeya Ceelasha Biyaha iyo deegaanka Tareedisho.

Kooxdaan ayaa maanta lagu arkay deegaannada Xaawo-Cabdi iyo Lafoole oo dhaca inta u dhexeysa Afgooye iyo Ceelasha Biyaha, sidoo kale cabsi xoog leh ayaa ka taagan degmada Afgooye oo looga baqayo inay Shabaab soo weeraraan.

Sidoo kale, Saakay salaaddii weerar ay ku soo qaadeen degmada Awdheegle ayaa caawa gabalku ugu dhacay iyagoo dhinac ka jooga magaalada, oo ka baqdin qaba haddii ay u baxaan banaanka in la duqeeyo, maadaama diyaaradaha dagaalka ay dul wareegayaan Awdheegle, gudaha magaaladana aan lagu duqeyn karin.

Hadal-heyn culus ayaa caawa ka taagan caasimadda Muqdisho oo sidaan ay Shabaab ugu soo dhawaadeen markii ugu horeysay 10-kii sano ee lasoo dhaafay, kooxda ayaa horay ugu goodisay in 17-ka Ramadaan ka hor ay Muqdisho qabsanayaan.

Ugu yaraan labo goobood oo kale oo ka tirsan Shabeellaha Dhexe, gaar ahaan deegaanno hoos taga degmada Cadale ayaa maanta lagu dagaalamay, halkaas oo Shabaab badan lagu laayey, in kastoo dhankaasna ay kooxdu kasoo dhawaatay.

Soomaaliya ayaa hadda u baahan badbaado deg deg ah, maadaama Al-Shabaab ay wadaan weerarro is dabajoog ah oo aan horay loo arag, halka awoodda ciidamada qaranka ay sii dhimayso, halka meelaha qaarna ay ka jirto abaabul yari iyo gaabis dhanka dowladda ah.

The post Xog xasaasi ah: Al-Shabaab oo caawa soo galay Ceelasha Biyaha – Maxaa ka socda dalka? appeared first on Caasimada Online.