Wakiilkii Midowga Afrika u qaabilsanaa Soomaaliya oo xil sare loo magacaabay

[Deeq A.]

Muqdisho (Caasimada Online) – Guddoomiyaha Guddiga Midowga Afrika, Maxamuud Cali Yuusuf, ayaa si rasmi ah u magacaabay Mohamed El-Amine Souef inuu noqdo Madaxa Shaqaalaha cusub ee xafiiskiisa.

Souef wuxuu xilkan kala wareegayaa Mohamed El Hacen Lebatt, oo horey u hayay jagadan.

Magacaabistan ayaa kusoo beegmaysa xilli ay socoto xil-wareejinta rasmiga ah ee hoggaanka Guddiga Midowga Afrika (AUC), taasoo ka dhacday magaalada Addis Ababa, oo ah xarunta Midowga Afrika.

Waa kuma Mohamed El-Amine Souef?

Ka hor inta aan xilkan loo magacaabin, Souef wuxuu ahaa Wakiilka Gaarka ah ee Guddoomiyaha Guddiga Midowga Afrika u qaabilsan Soomaaliya iyo Madaxa Hawlgalka Kala-guurka Midowga Afrika ee Soomaaliya (ATMIS), laga bilaabo Sebtember 1, 2022.

Sidoo kale, wuxuu horey u soo noqday:

• Madaxa Xafiiska Gobolka ee Hawlgalka Isku-dhafka ah ee Qaramada Midoobay iyo Midowga Afrika ee Darfur (UNAMID).
• Wasiirka Arrimaha Dibadda iyo Iskaashiga Caalamiga ah ee Jasiiradda Comoros (1999–2006).

Intaas waxaa dheer, Souef waa qoraa caan ah, wuxuuna qoray shan buug oo la xiriira arrimaha siyaasadda iyo juquraafi siyaasadeedka. Wuxuu ku hadlaa afar luqadood: Faransiis, Ingiriis, Carabi, iyo Swahili.

Dib-u-habaynta xafiiska guddoomiyaha AUC

Magacaabistan waxay qayb ka tahay dib-u-habeyn ballaaran oo lagu sameeyay xafiiska Guddoomiyaha Guddiga Midowga Afrika, kaddib doorashadii dhowaan dhacday.

Isbeddellada lagu sameeyay jagooyinka sare ee xafiiska waxaa ka mid ah Moussa Mohamed Omar, oo loo magacaabay Ku-xigeenka Madaxa Shaqaalaha, isagoo beddelay Tordeta Ratebaye.

Febraayo 15, 2025, ayey ahayd markii Maxamuud Cali Yuusuf, Wasiirka Arrimaha Dibadda ee Jabuuti tan iyo 2005, loo doortay inuu hoggaamiyo Guddiga Fulinta Midowga Afrika.

Maxamuud ayaa helay taageeradii loo baahnaa ee laba-meelood laba ka mid ah codadka hoggaamiyeyaasha gobolka, taasoo u suuragelisay inuu qabto xilka wakiilka qaaradda, oo ay ku nool yihiin 1.5 bilyan oo Afrikaan ah.

Diblomaasiyiin yar ayaa leh waayo-aragnimo la mid ah tan diblomaasiga 59-jirka ah, Maxamuud Cali Yuusuf. Waxaana u sahlay inuu hoggaanka qabto ololihiisii xasilloonaa, kaas oo uu kaga guuleystay siyaasiga rug-caddaaga ah ee Kenya, Raila Odinga.

The post Wakiilkii Midowga Afrika u qaabilsanaa Soomaaliya oo xil sare loo magacaabay appeared first on Caasimada Online.