Daawo: Abuu Cubeyda oo mar Shabaab-ka ku amray inay Galmudug ka soo baxaan

[Deeq A.]

Muqdisho (Caasimada Online) – Sanad ka hor hoggaamiyaha kooxda Al-Shabaab, Abuu Cubeyda, ayaa Shabaab-ka jooga Mudug iyo Galgaduud (Galmudug) ku amray inay isaga soo baxaan dagaalka oo u soo gudbaan koonfurta dalka, isagoo go’aankiisa ku saleynaya inay Jabeen.

Xogtaan waxaa bixiyey nin kasoo goostay Al-Shabaab oo mar ahaan jiray guddoomiyaha gobolka Sh/Dhexe, intii aan loo magacaabin Kabo-kutukade oo hadda guddoomiyaha gobolkaas ugu magacaaban kooxda.

Sheekh Cali Wajiis oo u waramahay SNTV ayaa sheegay in dagaalkii Cawsweyne ka hor uu hoggaamiyaha Al-Shabaab Abuu Cubeyda amar ku bixiyey in Galgaduud la isaga soo baxo, iyadoo Al-Shabaab ay xiligaas ka quusteen inay hor istaagaan ciidamada dowladda.

“Markii uu bixiyey amarkaas, horjoogayaashii Al-Shabaab ee Galgaduud waxay amreen in hal dagaal la galo hadii lagu jabana la isaga soo baxo Galgaduud oo Jubooyinka la isugu tago, balse halkii dagaal wuxuu noqday weerarkii Cawsweyne, halkaas oo ciidanka dowladda ay ku jabeen,” ayuu yiri Sheekh Cali Wajiis.

Shiiqa oo soo xiganayey nin ka soo goostay Al-Shabaab oo xabsiga uu ku soo wareystay Wasiir Mukhtaar Roobow oo ay is yaqaaneen ayaa yiri “Anagoo jabnay oo go’aansanay in Galmudug aan isaga baxno, ayaad dagaalka ka soo baanateen, dowladdu hadii Cawsweyne kadib ay hal weerar nagu soo qaadi laheyd waan jabnay oo waan iska carari laheyn,” ayaa laga soo xigtay ninkii kasoo goostay kooxda oo hadda ku jira xarunta dhaqan-celinta ee dowladda Soomaaliya ay u diyaarisay kooxda.

Sheekh Cali Wajiis ayaa ku taliyey in Al-Shabaab dagaal looga furo dhowr jiho, si looga adkaado, isagoo dowladda ugu baaqay inay la timaado qorshe dagaal oo looga faa’iideysan karo ciidamada qaranka iyo kuwa deegaanka oo sida uu sheegay meel kasta dhooban.

“Qalad badan ayaa ka jira farsamada dagaalka, waxaa yar aqoonta ay dowladdu u leedahay cadowgeeda, Ciidanku waxay iskugu imaa karaan, halgoob oo lagu balamay hadii shan jiho weerar looga soo qaado kooxda Al-Shabaab,” ayuu yiri Sheekh Cali Wajiis.

Hoos ka daawo

 

 

The post Daawo: Abuu Cubeyda oo mar Shabaab-ka ku amray inay Galmudug ka soo baxaan appeared first on Caasimada Online.