Sawirro: Xasan Sheekh oo sameeyey arrin aad loo amaanay

[Deeq A.]

Muqdisho (Caasimada Online) – Madaxweynaha Soomaaliya Xasan Sheekh Maxamuud ayaa galabta garoonka diyaaradaha ee magaalada Muqdisho uga hortagay qaar ka mid ah geesiyaasha Ciidanka Xoogga Dalka ee ku soo dhaawacmay dagaalka lagu ciribtirayo Khawaarijta ee ka socda gobolka Shabeellaha Dhexe.

Madaxweynaha ayaa Allaah uga baryay inuu caafimaad taam ah siiyo geesiyaasha dhaawaca ah ee habeen iyo maalin u taagan difaaca diinta, dadka, iyo dalkeenna hooyo.

Sawirro iyo muuqaallo laga soo duubay oo lagu baahiyay baraha bulshada ayaa muujinaya madaxweynaha oo mid mid u salaamaya, una xog-waraynaya askarta dhaawaca ah.

Markii uu goobta booqday madaxweynuhu, waxaa ciidamada dhaawacyada qaba laga soo dejinayay diyaarad milateri. Goobta waxaa taagnaa gaadiidka ambalaasta oo loogu qaaday isbitaallada Muqdisho.

Askarta uu madaxweynuhu dhaawacyadooda ku sugay kuna arkay gudaha garoonka waxay ku soo dhaawacmeen dagaallo culus oo maanta ay Shabaab kula galeen deegaanada Bursa-Sheekh iyo Labo-Garas oo ka tirsan Shabeellaha Dhexe.

Askartan ayaa la sheegay inay ka tirsan yihiin ciidankii kasoo goostay Jubbaland, kuwaas oo dhowaan laga qaaday Muqdisho, kadib markii kooxda Al-Shabaab ay weerarro rogaal-celis ah ku soo qaaday gobolka Shabeellaha Dhexe.

Dowladdu waxay sheegtay in Madaxweyne Xasan Sheekh uu garoonka uga hortagay dhaawacyada askarta, balse wararka qaar waxay sheegayaan in Xasan Sheekh oo ka yimid Imaaraadka uu garoonka kula kulmay askartan dhaawaca ah oo laga keenay Shabeellaha Dhexe.

Ciidanka Xoogga Dalka ayaa wada dagaal cirka iyo dhulka ah oo lagu ciribtirayo haraadiga kooxaha Khawaarijta ee ku dhuumaaleysanaya gobollada dalka qaarkood. Si gaar ah, gobolka Shabeellaha Dhexe waxaa ka socda dagaal aan kala joogsi lahayn.

The post Sawirro: Xasan Sheekh oo sameeyey arrin aad loo amaanay appeared first on Caasimada Online.