Xog: Fahad iyo Kheyre oo ku kulmay Nairobi – Maxaa socda?

[Deeq A.]

Nairobi (Caasimada Online) – Ra’iisul Wasaarihii hore ee Soomaaliya, Xasan Cali Kheyre, ayaa maanta soo qabanqaabiyay kulan afur ah oo uu la yeeshay Agaasimihii hore ee NISA, Fahad Yaasiin, iyo Xildhibaan Aadan Qoryooley oo ka tirsan Baarlamaanka Federaalka, kaasoo ka dhacay magaalada Nairobi ee dalka Kenya.

Kheyre ayaa horey u joogay Nairobi, halka Fahad Yaasiin uu maanta tegay, isagoo qorsheynaya inuu halkaas ku soo bandhigo buug uu dhowaan qoray.

Fahad Yaasiin, Xasan Cali Kheyre, iyo Xildhibaan Aadan Qoryooley ayaa kulankan kaga wada hadlay xaaladda guud ee dalka iyo marxaladihii ugu dambeeyay ee siyaasadda iyo dagaalka Khawaarijta.

Fahad iyo Kheyre ayaa muddo saddex sano ah wada shaqeynayay xilligii Farmaajo, iyadoo ugu dambeyn xilka laga tuuray kadib markii uu isku dhacay Farmaajo iyo Kheyre.

Sida ay ilo-wareedyo xog ogaal ah u sheegeen Caasimada Online, kulankii galabta ay xubnahani ku yeesheen Nairobi wuxuu ku koobnaa is xogwareysi, iyadoo uusan jirin qorshe siyaasadeed oo weyn oo dhinacyadu isku garteen inay wada fuliyaan.

Dhowaan, Fahad Yaasiin oo bixiyay wareysi dheer ayaa ka hadlay xaaladda guud ee dalka, isagoo si weyn u dhaliilay hoggaaminta Xasan Sheekh, kana sheekeeyay arrimo dhowr ah oo uu ra’yigiisa ku cabiray.

Fahad ayaa hadda Nairobi u jooga inuu soo bandhigo buug uu ka qoray taariikhda wanaagsan ee Nabi Muxamed (NNKH), kaasoo uu dhowaan gabagabeeyay qormadiisa.

The post Xog: Fahad iyo Kheyre oo ku kulmay Nairobi – Maxaa socda? appeared first on Caasimada Online.