Xog: Imaaraadka oo ka soo jawaabi diiday codsiga DF iyo Xasan oo aaday Abu Dhabi

[Deeq A.]

Muqdisho (Caasimada Online) – Dowladda Soomaaliya oo ay soo wajahday dhaqaale-yari baahsan ayaa maalmo ka hor kaalmo lacageed weydiisatay dowladda Imaaraadka Carabta, iyadoo weliba codsigeeda ku dartay in degdeg looga soo jawaabo.

Sida ay ogaatay Caasimada Online, Imaaraadka ayaa la soo daahay jawaabtii, waxaana maanta safar qarsoodi ah ku baxay Madaxweyne Xasan Sheekh oo Imaaraadka aaday, si toos ahna u soo weydiisto waxa ay Soomaaliya ka rabto Imaaraadka.

Dowladda Soomaaliya ayaa Imaaraadka ka codsatay kaalmo dhaqaale oo degdeg ah iyo taageero militari oo duqeymo u badan, maadaama Khawaarijta Al-Shabaab ay soo qaaday weerar rogaal-celis ah.

Lacagta ay Soomaaliya Imaaraadka ka codsatay waa mid badan, waxaana baahiyaha ay qoratay ka mid ah dhaqaale ay u rabto ciidamada Danab oo Mareykanku taageeradii ka jartay iyo kab miisaaniyadeed; sidoo kale duqeymo iyo saanad militari ayey Soomaaliya weydiisatay Imaaraadka.

Ilo wareedyada xogtan siiyey Caasimada Online waxay xaqiijiyeen in Imaaraadku ka cagajiiday inuu ka soo jawaabo codsigii Soomaaliya, taasina ay sababtay in Madaxweyne Xasan Sheekh uu safar degdeg ah ugu baxo Abu Dhabi.

Dowladda Imaaraadka ayaa si weyn u taageertay Xasan Sheekh bilowgii muddo-xileedkiisa labaad, waxayna dhaqaale badan ku bixiyeen baahiyihii jiray Soomaaliya, balse waxay mar dhexe ka caroodeen daah-furnaan la’aan ay ka dareemeen habka loo maamulo lacagihii ay ku bixin jireen dhinacyo badan oo amniga Soomaaliya ah.

Ciidamo badan oo kuwa suga amniga Caasimadda Muqdisho ay ugu horreeyaan ayuu Imaaraadku Soomaaliya u tababaray. Markii ay shaki ka muujiyeen qaabka loo maamulo dhaqaalaha ay bixiyaan, waxay saraakiil muhiim ah oo Imaaraati ah u xilsaareen baaritaan, balse waxaa lagu dilay xerada Jeneraal Gordan, waxaana dilay askari la aaminsan yahay in markii hore uu Shabaab ka yimid, kana mid ahaa ciidankii xeradaas tababarka ku qaadanayey.

Wixii ka dambeeyay markii shilkaasi dhacay, Imaaraadka ayaa hoos u dhigay taageeradii xad-dhaafka ahayd ee xukuumadda Xasan Sheekh, waxayna bilaabeen inay kor u soo qaadaan maamul-goboleedyada, heer ay gaareen in toddobaadyo ka hor ay waddan ahaan u casuumaan Madaxweynaha Somaliland Cabdiraxmaan Cirro.

Dowladda Soomaaliya ayaa iska indhatiraysa daandaansiga Imaaraadka iyo xadgudubka ay mararka qaar kula kacayaan madax-bannaanida Jamhuuriyadda Soomaaliya. Wasiiru-dowlaha arrimaha dibadda, Cali Balcad, ayaa maalin ka hor SNTV ka sheegay in wax dhib ah aysan ku qabin hab-dhaqanka Imaaraadka.

The post Xog: Imaaraadka oo ka soo jawaabi diiday codsiga DF iyo Xasan oo aaday Abu Dhabi appeared first on Caasimada Online.