Xildhibaan Soomaali ah oo muddo lagu la’aa Nairobi oo si lama filaan ah loo helay

[Deeq A.]

Nairobi (Caasimada Online) – Xildhibaan Yuusuf Xuseen Axmed, oo ka tirsan golaha deegaanka Dela ee Ismaamulka Wajeer, ayaa xalay fiidkii si lama filaan ah loogu soo celiyey gurigiisa ku yaalla magaalada Nairobi ee caasimadda Kenya, kadib muddo lix bilood ah oo la la’aa.

Sida laga soo xigtay ehelladiisa, rag wejiga duubtay ayaa gaari ku soo hor dhigay gurigiisa, illaa haddana faah-faahin lagama hayo halka uu muddadaas ku maqnaa xildhibaanka.

Xildhibaan Yuusuf ayaa la afduubtay 13-kii Sebtembar 2024 xilli uu saarnaa gaari nooca Uber ah oo marayay waddada Enterprise ee magaalada Nairobi.

Xildhibaan Aadan Keynaan Wehliye, oo ka tirsan golaha deegaanka, ayaa BBC-da u sheegay in xildhibaanka la waayay muddo lix bilood ah, kadibna xalay fiidkii la keenay gurigiisa iyadoo ay wadeen rag aan la garaneyn.

Xaaladdiisa caafimaad

Dhakhaatiir ayaa hadda baaraya xaaladda caafimaad ee xildhibaanka, waxaana la sheegay in uu caafimaad ahaan wanaagsan yahay, inkastoo ay ka muuqato daal iyo nafaqo-darro.

Keynaan ayaa tilmaamay in xildhibaanku hadda uu dib ula midoobay qoyskiisa, isla markaana si rasmi ah loo xaqiijin doono xaaladdiisa caafimaad kadib baaritaan dheeraad ah.

“Hadda niyaddiisa waa fiican tahay, waxa uu la joogaa dhakhaatiirta, xaalkiisa wuu wanaagsan yahay in kastoo hurdo la’aan iyo nafaqo darro ay ka muuqato,” ayuu yiri xildhibaan Keynaan.

Sidee markii hore lagu waayay xildhibaanka?

Xildhibaanka ayaa waxaa la sheegay in xilli fiid ah ay afduubteen koox watay labo gaari oo nooca Land Cruiser Prado ah.

Darawalkii Uber-ka ee la socday Xildhibaanka ayaa markii dambe sheegay in labada gaari ay jidka hor istaageen, kadibna xildhibaanka la kaxeystay, iyadoo aan la garanayn cidda ka dambeysay falkaas.

Muddo bil kadib, meyd lagu arkay isbitaalka Wajeer ayaa loo maleynayay inuu yahay xildhibaanka, balse baaritaan la sameeyay ayaa caddeeyay in uu qof kale yahay.

Ilaa haddana lama oga sababta rasmiga ah ee loo afduubtay xildhibaanka, mana jirto cid si rasmi ah u sheegatay mas’uuliyadda afduubkiisa.

Maxay ehelladiisu ka yidhaahdeen afduubka?

Qoyska xildhibaanka ayaa mar kasta rajo ka qabay in la helayo, iyagoo sheegay in aysan ogeyn wax dambi ah oo uu galay.

“Waan ogayn in uu nool yahay, rajo fiican ayaanu ka qabnay in uu dib noogu soo laabanayo,” ayey tiri walaashiis Xaliimo Xuseen.

Qoyska xildhibaanka ayaa dhowr jeer ku eedeeyay dowladda in ay ka gaabisay raadintiisa, waxayna sheegeen in aysan qaadin wax tallaabo ah.

Sidoo kale, siyaasiyiinta gobolka iyo qoyska xildhibaanka ayaa dowladda ku eedeeyay in aysan wax dadaal ah gelin raadinta xildhibaanka, iyagoo sheegay in aysan jirin cid rasmi ah oo baaritaan dhab ah ku sameysay afduubkiisa.

Weli su’aalaha ugu waaweyn ee taagan ayaa ah; Yaa ka dambeeyay afduubkan? Muxuu salka ku hayay? Maxaase xildhibaanka loo beegsaday? Su’aalahaas ayaan weli loo helin jawaabo rasmi ah.

The post Xildhibaan Soomaali ah oo muddo lagu la’aa Nairobi oo si lama filaan ah loo helay appeared first on Caasimada Online.