XASAN oo ku dhawaaqay arrin ka cusub doorashada qof iyo codka ah

[Deeq A.]

Muqdisho (Caasimada Online) – Madaxweynaha Soomaaliya, Mudane Xasan Sheekh Maxamuud ayaa markale ka hadlay doorashooyinka dalka ee uu weli muranka ka taagan yahay, isaga oo ku dhawaaqay arrin ka cusub qorshaha uu wado ee qof iyo codka ah.

Madaxweynaha ayaa tilmaamay in tilmaamay in la beddalay fikirkii hore ee ahaa in dalka uu yeesho laba xisbi, isaga oo hoosta ka xariiqay in haatan laga dhigay saddex xisbi oo uu tilmaamay in loo baahan yahay inay ku biiraan muwaadiniinta Soomaaliyeed.

Sidoo kale waxa uu madaxweynuhu xusay in arrintan ay keeneyso in xisbiga uu ku qasbanaanayo inuu cod ka raadsado magaallo kasta oo Soomaaliyeed, maadaama waxa codeynaya ay yihiin shacabka oo soo dooranayo hoggaankooda.

“Fikirkii ahaa dalka laba xisbi ha yeesho hadda saddex ayaa laga dhigay, weli waa fiicanahay ogow marka aan aniga xisbi leeyahay cod aan u baahanahay waxaan ku qasbanahay kan Kismaayo joogo kan Baydhaba jooga, kan Garoowe joogo iyo kan jooga Dhuusamareeb inaan wada raadsado” ayuu yiri madaxweyne Xasan Sheekh Maxmuud.

Dhinaca kale, madaxweynaha ayaa sheegay in doorashooyinka dadban ee lasoo maray ay dhaawac weyn u gaysteen kalsoonida Soomaaliya, haddana lagama maarmaan ay tahay in laga gudbo, si loo aado doorasho dadweyne oo qof iyo cod ah.

Xasan Sheekh ayaa hoosta ka xariiqay in sidoo kale beesha caalamka aysan xilligan diyaar u ahayn inay la shaqeyso dowlad ku timaada nidaam doorasho dadban oo lagu celiyo dalka.

“25 sano doorasho dadban ayaan joognaa, masii joogi karno, macquulna ma ahan, mana nala aqbalayo. Caalamku nama aqbalayo inaan sidaas dowlad ku ahaano oo nagula macaamilo. Waxay na leeyihiin, ma naqaano waxay ka shaqeynayaan,” ayuu mar kale yiri madaxweynuhu.

Hadalkan ayaa xalay madaxweynaha waxa uu ka sheegay kulan ku maamuusay haldoorka haweenka Soomaaliyeed, munaasabad 8-da Maarso oo ah Maalinta Haweenka Adduunka awgeed, kaas oo ka dhacay xarunta Villa Soomaaliya.

Madaxweynaha ayaa si qoto dheer u sharraxay kaalinta muhiimka ah ee haweenka Soomaaliyeed ee ku aadan siyaasadda, doorashooyinka iyo  dagaalka lagula jiro kooxda argagixisada ah ee Al-Shabaab, isaga oo qiray in  haweenku ay udub-dhexaad u yihiin bulshada.

Waxaa kale oo uu xusay muhiimadda ay leedahay in haweenka Soomaaliyeed ay si firfircoon uga qayb qaataan hannaanka doorashooyinka tooska ah ee qof iyo codka ah, oo dowladda Soomaaliya ay dhexda u xiratay inay hirgeliso. Xasan ayaa sheegay in doorashada dadweynaha ay fursad u siinayso bulshada inay codkooda dhiibtaan, u tartamaan xilalka qaranka, ayna door muuqda oo wayn ku yeeshaan hoggaanka dalka.

The post XASAN oo ku dhawaaqay arrin ka cusub doorashada qof iyo codka ah appeared first on Caasimada Online.