Duqayn Cirka ah oo Lagu Dilay Sarkaal Sare oo Ka Tirsanaa Al-Shabaab

[Deeq A.]

Wararka ka imanaya gobolka Galgaduud ayaa sheegaya in duqayn dhinaca cirka ah oo lala beegsaday xarun ay kooxda Al-Shabaab ku lahayd deegaanka Ceel-Bacad lagu dilay Yuusuf Dhignaas, oo ka mid ahaa xubnaha kooxda.

Sida wararku sheegayaan, duqaynta ayaa ka dhacday xilli ay kooxda Al-Shabaab si khasab ah ugu yeertay dad shacab ah, si ay uga qaadaan lacago ay ugu yeeraan “sakawaat.”

Ilo-wareedyo maxalli ah ayaa sheegaya in diyaarad dagaal ay si toos ah u beegsatay goobtii uu joogay Yuusuf Dhignaas, taasoo sababtay dhimashadiisa iyo khasaare kale oo aan weli la caddeyn.

Ceel-Bacad waa deegaan muhiim ah oo ku yaalla xuduudka kala qaybiya gobollada Shabeellaha Dhexe iyo Galgaduud. Waa meel istiraatiiji ah oo ay Al-Shabaab muddooyinkii dambe ku xoogeysanayeen iyagoo halkaas ka fulin jiray qorshahooda ururinta lacagaha baadda ah iyo dhaqdhaqaaqooda militari.

Duqayntan ayaa qeyb ka ah howlgallada ballaaran ee lagu wiiqayo awoodda Al-Shabaab, kuwaas oo ay fuliyaan ciidamada dowladda Soomaaliya iyo saaxiibadooda caalamiga ah.

Source: goobjoog.com