DF oo soo saartay go’aano la xiriira amniga garoonka diyaaradaha Aadan Cadde

[Deeq A.]

Muqdisho (Caasimadda Online) – Tan iyo markii ay soo baxeen digniinaha amni ee garoonka diyaaradaha Aadan Cadde ee magaalada Muqdisho waxay dowladda qaaday tallaabooyin lagu xoojinayo amniga garoonka.

Wasiirka Warfaafinta Soomaaliya, Daa’uud Aweys Jaamac oo la hadlay warbaahinta qaranka ayaa sheegay in go’aanka lagu mamnuucayo hubka ee garoonka diyaaradaha Aadan Cadde ay gaareen golaha wasiirada, kadib markii ay dood xasaasi ah ka yeesheen arrintan.

Wasiirka ayaa xusay in go’aanka ka soo baxay golaha wasiirada ee lagu mamnuucayo hubka loo qaatay in lagu xakameeyo hubka galaya garoonka diyaaradaha Muqdisho.

Wasiirka Warfaafinta Soomaaliya, Daa’uud Aweys Jaamac ayaa caddeeyay in ujeedka mamnuucidda hubka ee garoonka diyaaradaha uu yahay xojinta amniga iyo ilaalinta badqabka shacabka ku safra halkaasi.

Golaha Wasiirrada oo shalay yeeshay shirkoodii caadiga ahaa ayaa waxay go’aamiyeen in aan wax hub iyo gaadiid dagaal lala geli karin xeyndaabka garoonka diyaaradaha ee Aadan Cadde ee magaalada Muqdisho.

Labadii toddobaad ee la soo dhaafay, waxaa soo baxayay digniino ku aaddan weerarro argagixiso oo lala maagan yahay garoonka caalamiga ah ee Aadan Cadde International Airport ee magaalada Muqdisho.

Talaadadii la soo dhaafay, Safaaradda Mareykanka ee magaalada Muqdisho ayaa uga digtay muwaadiniinta Mareykanka ah ee ku sugan Soomaaliya ‘weerarro laga cabsi qabo’ oo ka dhici kara goobo badan oo uu ku jiro garoonka diyaaradaha Muqdisho.

Saacado kadib digniinta Mareykanka, shirkadaha diyaaradaha ee Qatar Airways iyo Turkish Airlines ayaa si ku-meel-gaar ah u hakiyay duulimaadyadii ay ku tagi lahaayeen Muqdisho, inkasta oo aysan caddayn xiriirka ka dhexeeya duulimaadyada la hakiyay iyo digniinta Mareykanka.

The post DF oo soo saartay go’aano la xiriira amniga garoonka diyaaradaha Aadan Cadde appeared first on Caasimada Online.