Mareykanka oo sheegay in uu tageerayo Puntland kadib markii uu jaray kaalmadii DF

[Deeq A.]

Washington (Caasimada Online) – Ciidanka Mareykanka waxay u muuqdaan inay sii joogi doonaan gobolka Puntland ee Soomaaliya, iyadoo ay diyaarinayaan inay kordhiyaan dadaalkooda dagaalka ka dhanka ah kooxda Daacish, sida uu sheegay mas’uul sare oo ka tirsan Waaxda Gaashaandhigga Mareykanka ee Pentagon-ka.

Waxa uu ka hadlay welwelka laga qabo in ciidamada Mareykanka ay ka baxaan Puntland maalmaha soo socda.

Imaaraadka Carabta iyo Taliska Mareykanka ee Afrika (AFRICOM), oo ah taliska ciidamada Mareykanka ee gobolka Afrika, ayaa Puntland ka taageeray duqeymaha cirka ee ka dhanka ah dagaalyahanada Daacish, kuwaas oo ka qayb qaatay burburinta godadka iyo meelo qarsoodi ah oo kooxda Daacish ay ku leedahay buuraha Cal-Miskaad.

Toddobaadyadii ugu dambeeyay, ciidamada Mareykanka waxay ku dhawaaqeen dhimashada 16 dagaalyahan oo uu ku jiro Axmed Maeleninine, oo uu sheegay mas’uuliyiin Mareykan ah in uu ahaa “qof ka shaqeynayay soo xulista, maalgelinta, iyo hoggaaminta hawlgallada dibadda, mas’uul ka ahaa soo dirista dagaalyahanada jihaadiga ah ee Mareykanka iyo Yurub.”

Mas’uul sare oo ka tirsan Wasaaradda Difaaca ee Mareykanka ayaa VOA u sheegay in Washington ay diyaar u tahay inay bixiso caawimaad dheeri ah. Puntland ayaa ballan qaaday inay laba laabi doonto dadaallada.

“Waaxda Difaaca waxay sii wadi doontaa taageerada dadaallada wada-shaqeynteenna ee lagu hakinayo, waxyeellada, iyo ka guuleysashada ururrada argagixisada ee Geeska Afrika,” ayuu yiri.

Fallanqeeyayaasha ayaa sheegay in cadaadiska “joogtada ah” ee ciidamada Soomaaliya, oo ay weheliso caawimada Mareykanka iyo Imaaraadka, uu u muuqdo inuu bilaabay inuu wax ka qabto xaaladda.

“Calaamadaha ayaa muujinaya in ciidamada Puntland ay horumar dhab ah ka sameynayaan la dagaallanka Daacish, gaar ahaan meelaha ay ku dhuumanayaan ee Soomaaliya,” ayaa yiri sarkaal hore oo reer Galbeed ah oo ka hadlay horumarka socda, codsaday in aan la shaacin magaciisa.

Hadalka sarkaalka Pentagon-ka ee ku saabsan in ay sii wadi doonaan taageerada ciidanka Puntland ee la-dagaalamaya Daacish ayaa imanaya, xilli dowladda Soomaaliya ay sheegtay in Mareykanka uu hakiyey maal-gelintii ciidanka Danab.

Guutada Danab, oo ah unug khaas ah oo ka tirsan CXDS, ayaa lagu aas-aasay tababar iyo taageero uu bixiyay Mareykanka si loola dagaallamo argagixisada loona xasiliyo dalka.

Hase yeeshee, Wasiir  Maaliyadda Soomaaliya Biixi Iiman Cige ayaa ka digay in joojinta degdegga ah ee maalgelinta Mareykanka ay si weyn u wiiqday miisaaniyadda dowladda.

“Culayska ugu weyn ee dowladda heysta xilligan waa luminta maalgelintii Mareykanka uu horey ugu qoondayn jiray ciidamada Danab,” ayuu yiri wasiirka.

Wasiirku wuxuu intaas ku daray in dhimista maalgelinta ay sidoo kale saameyn ku yeelatay barnaamijyada gargaarka iyo horumarinta, taasoo sii xoojisay caqabadaha dhaqaale ee dalka.

Sida lagu sheegay qiimeyn ay sameysay Wasaaradda Maaliyadda, Soomaaliya waxa ay lumisay qiyaastii $1.5 bilyan oo gargaar sannadle ah, taasoo kordhisay cadaadiska dhaqaale ee dowladda.

Ma cadda haddii taageerada Mareykanka uu sheegay in uu sii wadayo ee Puntland ay ku kooban tahay oo kaliya duqeymaha, iyo haddii ay qeyb ka tahay kalmo maaliyadeed.

The post Mareykanka oo sheegay in uu tageerayo Puntland kadib markii uu jaray kaalmadii DF appeared first on Caasimada Online.