DF oo xaqiijisay tallaabadii Mareykanka uu qaaday ee ciidamada Danab

[Deeq A.]

Muqdisho (Caasimada Online) – Mareykanka ayaa joojiyay maalgelintii uu siin jiray cutubka gaarka ah ee Danab ee Ciidanka Xoogga Dalka Soomaaliyeed (CXDS) iyo sidoo kale balaayiin dollar oo deeqo ah oo horey loo marsiin jiray Hay’adda Horumarinta Caalamiga ah ee Mareykanka (USAID), waxaa sidaas maanta baarlamaanka ka hor sheegay Wasiirka Maaliyadda Soomaaliya, Biixi Imaan Egeh.

Guutada Danab, oo ah unug khaas ah oo ka tirsan CXDS, ayaa lagu aas-aasay tababar iyo taageero uu bixiyay Mareykanka si loola dagaallamo argagixisada loona xasiliyo dalka. Hase yeeshee, Wasiir Biixi ayaa ka digay in joojinta degdegga ah ee maalgelinta Mareykanka ay si weyn u wiiqday miisaaniyadda dowladda.

“Culayska ugu weyn ee dowladda heysta xilligan waa luminta maalgelintii Mareykanka uu horey ugu qoondayn jiray ciidamada Danab,” ayuu yiri Biixi.

Wasiirka ayaa intaas ku daray in dhimista maalgelinta ay sidoo kale saameyn ku yeelatay barnaamijyada gargaarka iyo horumarinta, taasoo sii xoojisay caqabadaha dhaqaale ee dalka.

Sida lagu sheegay qiimeyn ay sameysay Wasaaradda Maaliyadda, Soomaaliya waxa ay lumisay qiyaastii $1.5 bilyan oo gargaar sannadle ah, taasoo kordhisay cadaadiska dhaqaale ee dowladda.

“Waa in aan si wadajir ah uga shaqeyno dardar-gelinta dib-u-habeynta canshuuraha, maaraynta gargaarka dibadda si hufan, iyo ka faa’iidaysiga kheyraadka la heli karo,” ayuu yiri Egeh. “Yareynta maalgelinta ma ahan mid ku kooban Mareykanka oo keliya, balse waa isbeddel caalami ah.”

Biixi ayaa sidoo kale ka digay in Soomaaliya ay qarka u saaran tahay dhibaato dhaqaale oo ba’an, isagoo ku booriyay dowladda inay si degdeg ah ugu diyaar garowdo saameynta ay yeelan karto.

Waxa uu xusay in sababaha qaar ee dhimista deeqaha ay la xiriiraan isbeddelada mudnaanta siyaasadeed ee Washington, gaar ahaan kaddib dib-u-doorashadii Madaxweyne Donald Trump, wuxuuna tilmaamay in USAID, oo ah hay’adda Mareykanka u qaabilsan horumarinta iyo gargaarka bani’aadannimo, ay si weyn hoos ugu dhigtay taageeradeeda.

Dowladda Soomaaliya ayaa hadda wajahaysa caqabadda raadinta ilo dhaqaale oo kale si ay u sii waddo hawlgalladeeda militari iyo barnaamijyadeeda horumarineed, iyadoo ay sii xoogeysanayaan culaysyada dhaqaale.

The post DF oo xaqiijisay tallaabadii Mareykanka uu qaaday ee ciidamada Danab appeared first on Caasimada Online.