Sidee Al‐Shabaab uga faa’iideysatay khilaafka XASAN iyo mucaaradka?

[Deeq A.]

Muqdisho (Caasimada Online) – Kooxda Al-Shabaab ayaa mar kale dib isku soo abaabushay, waxayna soo gashay deegaanno horay looga xoreeyay oo dhaca dowlad goboleedka HirShabelle, gaar ahaan Shabeelaha Dhexe, halkaas oo ay haatan ka socdaan howlgallo culus iyo dagaallo la’isaga caabinayo maleeshiyaadka argagixisada.

Xoogaga Shabaab ayaa dib u qabsaday deegaanno ku yaalla gobolkan oo horay looga xoreeyay, taas oo dhalisay walaac xoogan oo ku aadan howlgallada xoreynta ee dalka.

Haddaba Maxaa sababay dib ugu soo rogaal celinta kooxda Al-Shabaab?

Madaxweynihii hore ee Soomaaliya, Mudane Maxamed Cabdullahi Farmaajo oo warsaxaafadeed soo saaray ayaa ka hadlay arrintan, isaga oo sidoo kale taageero wayn iyo garab istaag u muujiyay ciidamada Xoogga dalka iyo kuwa dadka deegaanka.

Farmaajo ayaa shaaca ka qaaday in argagixisada ay ka dhex faa’iideysatay khilaafka siyaasadeed ee u dhexeeya mucaaradka iyo dowladda federaalka ee uu hoggaamiyo madaxweyne Xasan Sheekh, isla markaana taasi ay keentay in Al-Shabaab ay dib ugu soo rogaal celiyaan gobolka Shabeelaha Dhexe ee dowlad goboleedka HirShabelle.

“Dhaqdhaqaaqyada argagixisada Alshabaab ay ka sameeyeen deegaannada ka tirsan Shabeellaha Dhexe waxa ay muujinayaan sida argagixisadu ay uga faa’iideysanayaan khilaafaadka dhexdeenna ah iyo xasillooni la’aanta siyaasadeed ee dalka” ayuu yiri Farmaajo oo ku taliyay in si midnimo loo wajaho dagaalka adag ee lagula jiryo Shabaab.

Hoos ka akhriso warsaxaafadeedka:-

Waajib ayey inagu tahay dhammaanteen in aynu garab istaagno Ciidamada Qaranka Soomaaliyeed ee geesiyaasha ah, kuwaas oo kula dagaalamaya cadowga dhammaan furimaha dagaalka iyo goobaha ay soo weerareen ee Shabeellaha Dhexe. Arrintani malahan muxaafidnimo iyo mucaarad ee waa waajib qaran iyo masuuliyad taariikhi ah.

Dhaqdhaqaaqyada argagixisada Alshabaab ay ka sameeyeen deegaannada ka tirsan Shabeellaha Dhexe waxa ay muujinayaan sida argagixisadu ay uga faa’iideysanayaan khilaafaadka dhexdeenna ah iyo xasillooni la’aanta siyaasadeed ee dalka.

Dowladda Federaalka Soomaaliya waxaan ku adkaynaynaa in laga shaqeeyo midnimada iyo wadajirka ummadda Soomaaliyeed, xalna loo helo khilaafaadka siyaasadeed ee ka jira dalka si loo sii labo jibaaro howlgallada sifeynta dalka ee ka dhanka ah argagixisada Alshabaab iyo Daacish oo ay ciidamada ammaanka Puntland ka sifeynayaan deegaannada ay kaga dhuumaaleysanayaan buuraha Cal-Miskaad.

Waxaa muhiim ah in la xoojiyo dhiirri-gelinta ciidamada iyo abaabulka dadweynaha ee dagaalkan masiiriga ah, anigoo ugu baaqaya shacabka Soomaaliyeed in ay garab istaagaan ciidanka, kana feejignaadaan marin-habaabinta iyo beenta ay faafinayaan argagixisadu.

Ugu dambeyn, waxaan mar kale adkaynayaa sida ay muhiimka u tahay in la mideeyo dadaallada lagu cirib-tirayo kooxaha argagixisada ah, si Soomaaliya ay u hesho nabad waarta,  dadkeenuna ay ugu noolaadaan sharaf iyo qarannimo buuxda.

DHAMMAAD

 

The post Sidee Al‐Shabaab uga faa’iideysatay khilaafka XASAN iyo mucaaradka? appeared first on Caasimada Online.