Jubbaland oo bogaadisay tallaabo ay qaaday DF, soo saartayna baaq cajiib ah

[Deeq A.]

Kismaayo (Caasimada Online) – Dowlad goboleedka Soomaaliyeed ee Jubbaland ayaa si lama filaan ah uga hadashay tallaabadii ugu dambeysay ee ay qaaday dowladda Soomaaliya ee la xiriirta dagaalka adag ee ay ku qaaday Al-Shabaab-ka soo galay gobolka Shabeellaha Dhexe.

Ugu horreyn Jubbaland ayaa boggaadisay dagaalka ay wadaan ciidamada xoogga dalka iyo kuwa deegaanka ee looga hortagayo Al-Shabaab ee ka socda deegaannada maamulka HirShabelle.

Jubbaland ayaa sheegtay in dowladda dhexe iyo dowlad goboleedyada ay saaran tahay mus’uuliyad wadareed taabaneysa mustaqbalka dalka, loona baahan yahay midnimo iyo wadajir.

“Haddii aan si wadajir ah ugu midowno dagaalka ka dhanka ah argagixisada, waa hubaal in aynu gaari doono guullo waa wayn oo lagu xaqiijinayo amniga iyo xasilloonida dalka,” ayaa lagu yiri war-saxaafadeed kasoo baxay dowlad goboleedka Jubbaland.

Sidoo kale waxa ay ku baaqday in meel la dhigo khilaafka siyaaasiga ah, loona soo jeesto sidii dalka looga ciribtiri lahaa kooxaha argagixisada ah.

Dowladda Federaalka ayaa haatan wadda gulufkii ugu xoogganaa ee ka dhanka ah Al-Shabaab oo dib isugu soo abaabushau, soona gashay gobolka Shabeelaha Dhexe, waxaana haatan soconayo dagaallo iyo duqeymo lagu beegsaday argagixisada.

Qorshaha dowladda ayaa sidoo kale ah in maalmo kooban lagu soo afjaro Al-Shabaab-ka soo galay gobolka Shabeellaha Dhexe, iyadoo la isticmaalayo taatiko dagaal oo yareynayo ama laga baaqsanayo khasaare soo gaara shacabka iyo ciidamada qaranka, sida ay noo sheegeen saraakiisha hoggaamineysa howlgalka.

The post Jubbaland oo bogaadisay tallaabo ay qaaday DF, soo saartayna baaq cajiib ah appeared first on Caasimada Online.