Madaxweyne Deni oo 7 cisho u qabtay Odayaal dhaqan, ganacsato iyo culimo magaalooyinka Puntland uga shaqeeya kooxda Daacish

[Deeq A.]

Madaxweynaha dowladda Puntland, Siciid Cabdullaahi Deni oo xalay jeediyay khudbad ku saabsan dagaalka Cirib-tirka Argagixisada ayaa caddeeyay in ay jiraan odayaal dhaqameed, ganacsato iyo culimo magaalooyinka Puntland uga shaqeeya Kooxda Daacish.

“Waxaan rabaa halkan in aan baaq uga diro dadka Soomaaliyeed ee reer Puntland ee ururka Argagixisada Daacish la shaqeynaya oo magaalooyinka ku sugan ee aan furimaha dagaalka joogin kuwaasi oo Argagixisada u qaabilsanaa taakulada, dhaqaale ururinta, soo gudbinta xubnaha ku biiraya oo ay ganacsiyo u fureen.”

“Dadkaasi waxaan ugu baaqayaa in ay mudda 7 cisho ah in ay laamaha Amniga la soo xiriiraan in ay hawshaasi ka baxeenna caddeeyaan, liisaskooda waan haynaa, magacyadooda waan haynaa, waxaan u sheegaynaa mudda 7 cisho gudahood ah ciddii ku imaan weyda in aan tallaabo sharciga waafaqsan ka qaadi doono” ayuu yiri Madaxweynaha Puntland Siciid Deni.

“Dadkaasi waxay isugu jiraan bahda dhaqanka, Culimo iyo ganacsato waxa sidoo kale ku jira dad kala duwan oo bulshada jaah ku dhex leh oo aanan halkaan ka faahfaahin doonin, waxaan rabnaa fursaddaasi in aan siino qaladka ilaahay baa ma qaldame ah; qof kasta oo qaladkiisa ka soo noqda waa cafin doontaa dowladdu” ayuu sii raaciyay Deni.

Halkaan hoose ka daawo Hadalka Madaxweyne Deni

PUNTLAND POST

The post Madaxweyne Deni oo 7 cisho u qabtay Odayaal dhaqan, ganacsato iyo culimo magaalooyinka Puntland uga shaqeeya kooxda Daacish appeared first on Puntland Post.