Duqeymo culus oo caawa ka dhacay Puntland iyo faah-faahin laga soo saaray khasaaraha

[Deeq A.]

Boosaaso (Caasimada Online) – Duqeyn lagu dilay 25 Xubnood oo ka tirsan Argagixisada Daacish ayaa caawa mar kale ka dhacday buuraha Calmiskaad ee gobolka Bari, gaar ahaan deegaanka Miraale.

Goobta lala beegsaday duqeyntaas waxaa la sheegay inuu ku yaallo talis weyn oo muhiim u ahaa Daacish, sida Caasimada Online ay u sheegeen saraakiil ka tirsan Ciidamada Puntland ee dagaalka ku jira.

Sida lagu sheegay war rasmi ah oo kasoo baxay Taliska Howlgalka, duqeyntaan ayaa lagu beegsaday xubno firxad ah oo isku aruursanayay taliskaas, kuwaas oo la aaminsan yahay inay qorsheynayeen weerar iska caabin ah.

Howlgalkaan waxa fuliyay saaxiibada caalamka, kuwaas oo si hagar la’aan ah u garab taagan dadaallada Soomaaliya looga ciribtirayo kooxaha argagixisada.

Duqeynta ayaa qeyb ka ah dagaalka ballaaran ee ka socda Buuraleyda Calmiskaad ee gobolka Bari, Puntland, si meesha looga saaro khatarta ay kooxahani ku hayaan amniga iyo xasilloonida dalka.

Dhanka kale, ciidamada Puntland ayaa maanta howlgallo ka sameeyay deegaannada Kalriyaad, Saax, iyo Madaah ee gobolka Bari.

Howlgalkii maanta waxaa lagu burburiyay talisyo yar yar oo ay ku dhuumaaleysanayeen dagaalyahanada Daacish.

Ciidamada ayaa la wareegay agab ay kooxdaasi lahayd, sidoo kale, ciidamada ayaa gacanta ku dhigay dameero ay raranayeen argagixisadu, kuwaas oo loo adeegsanayay daabulidda sahayda kooxda.