Ciidamada difaaca Puntland oo maanta si nabad ah kula wareegay degaanka Dhaadhaar ee degmada Qandala

[Deeq A.]

Ciidamada difaaca dowladda Puntland oo saaka ka ruqaansaday tuulada Sheebaab ayaa sida la xaqiijinayo hadda la wareegay degaanka Dhaadaar oo ka tirsan degmada Qandala ee gobolka Bari.

Saraakiisha Ciidamada hoggaaminaysa ayaa soo sheegaya in aysan wax iska caabin iyo dagaal ah kala kulmin qabashada degaanka Dhaadaar oo ay si nabad ah kula wareegeen kaddib markii ay isaga carareen firxadka dagaallamayaasha Daacish.

Ciidamada dowladda ayaa xaqiijin amni iyo miino-baaris ka wada degaankaasi Dhaadhaar iyo nawaaxigeeda oo ay ka samaysan yihiin saldhigyo ay ka carareen mileeshiyaadka ISIS ee lagu soo jebiyay togga Jeceel ee buuraha Calmiskaad.

Ilo wareedyo amni oo xog-ogaal ah ayaa sheegaya in dagaallamayaashii Daacish ee ka cararay Dhaadaar in ay u baxsadeen buuraha lagu magacaabo Xaysimo ee degmada Qandala halkaasi oo leh ceelal iyo difaacyo dabiici ah oo lagu dhuuman karo.

PUNTLAND POST

The post Ciidamada difaaca Puntland oo maanta si nabad ah kula wareegay degaanka Dhaadhaar ee degmada Qandala appeared first on Puntland Post.