Ciyaaryahan Mesut Özil oo ku biiray siyaasadda Turkey, isaga oo noqday xubin sare

[Deeq A.]

Ankara (Caasimada Online) – Ciyaaryahan Mesut Özil, oo horey ugu guuleystay Koobka Adduunka isagoo ka mid ah xulka qaranka Jarmalka, ayaa hadda si rasmi ah ugu biiray siyaasadda Turkiga, isagoo noqday xubin sare oo ka tirsan xisbiga talada haya ee dalkaas.

Axaddii, Özil ayaa lagu soo daray guddiga dhexe ee go’aanka iyo fulinta ee Xisbiga Caddaaladda iyo Horumarka (AKP) intii lagu guda jiray shir ka dhacay Ankara. Munaasabaddaas, Madaxweyne Recep Tayyip Erdogan, ayaa mar kale dib loogu doortay hoggaanka xisbiga markii sagaalaad.

Ciyaaryahankan asal ahaan Jarmal-Turkish ah ayaa muddo dheer xiriir dhow la lahaa Erdogan. Sannadkii 2019, madaxweynaha Turkiga ayaa ka mid ahaa markhaatiyaasha arooska Özil iyo xaaskiisa Amine Gulse, oo horey ugu guuleysatay tartanka quruxda Turkiga.

Intii uu ku jiray xirfaddiisa kubadda cagta, Özil wuxuu u ciyaaray kooxaha Real Madrid, Arsenal, iyo Fenerbahçe, isaga oo ku guuleystay horyaalka La Liga ee Spain iyo afar koob oo FA Cup ah oo England ah.

Wuxuu 92 jeer u saftay xulka qaranka Jarmalka, isagoo la qaaday Koobka Adduunka sannadkii 2014. Waxa kale oo uu shan jeer ku guuleystay abaal-marinta ciyaaryahanka sannadka ee xulka Jarmalka, taasoo rikoor ah.

Si kastaba ha ahaatee, xiriirkiisa xulka qaranka Jarmalka ayaa xumaaday kaddib Koobkii Adduunka ee 2018, markaas oo uu ku dhawaaqay inuu ka fariistay ciyaaraha caalamiga ah, isaga oo ku eedeeyay warbaahinta Jarmalka iyo xiriirka kubadda cagta ee dalkaas (DFB) inay si cunsurinimo ah ula dhaqmeen.

“Markii aan guuleysano, waxaan ahay Jarmal, markii aan guul-darreysano, waxaan noqdaa muhaajir,” ayuu yiri waqtigaas.

Arrintan ayaa dhacday toddobaadyo kaddib markii Özil iyo Ilkay Gundogan, oo u ciyaara Manchester City isla markaana asalkiisu yahay Turkish, lagu dhaleeceeyay gudaha Jarmalka kaddib markii sawir ay la galeen Erdogan uu soo shaac baxay.

“Shaqadaydu waa ciyaaryahan kubadda cagta ah, ma aha siyaasi, kulankeenuna ma ahayn taageero siyaasadeed,” ayuu Özil ku sheegay hadal uu markaas bixiyay.

“Sida ay DFB iyo dad badan iila dhaqmeen awgeed, mar dambe ma doonayo inaan xirto funaanadda xulka Jarmalka. Waxaan dareemayaa in aanan la rabin, isla markaana wixii aan gaaray tan iyo markii aan qaranka ku biiray 2009 la illaaway.”

Tan iyo markaas, Özil wuxuu si firfircoon uga hadlay arrimaha siyaasadda iyo xuquuqda aadanaha.

Bishii December 2019, wuxuu si cad u cambaareeyay xasuuqa dowladda Shiinaha ku hayso Muslimiinta Uighur, taasoo caro gelisay Beijing. Kooxdiisii Arsenal ayaase si degdeg ah uga dheeraatay hadalkiisa.

Sanadkii xigay, wuxuu ka hadlay dagaalka u dhexeeya Armenia iyo Azerbaijan ee ka taagnaa gobolka lagu muransan yahay ee Nagorno-Karabakh, isagoo sheegay in dhulkaasi “sharciga iyo caalamkuba u aqoonsan yahay inuu ka tirsan yahay Azerbaijan, balse si sharci-darro ah loo haysto.”

Sidoo kale, Özil wuxuu si joogto ah u taageeraa xuquuqda Falastiiniyiinta, isaga oo si cad uga hor yimid tacaddiyada Israa’iil.

Özil ma ahan ciyaaryahankii ugu horreeyay ee ku biiro xisbiga AKP – Alpay Özalan, oo horey uga ciyaari jiray Aston Villa, ayaa xubin ka ahaa baarlamaanka Turkiga tan iyo 2018.