Maamulka Trump oo eedeyn ku saabsan Soomaaliya u jeediyey madaxweyne Biden

[Deeq A.]

Washington (Caasimada Online) – Dr. Sebastian Gorka, oo ah ku-xigeenka la-taliyaha madaxweynaha iyo agaasimaha sare ee la-dagaallanka argagixisada ee Golaha Amniga Qaranka ee Aqalka Cad, ayaa shaaca ka qaaday in maamulka Biden uu muddo ku dhow laba sano la socday dhaqdhaqaaqa hoggaamiye ka tirsan Daacish oo ku sugnaa Soomaaliya, balse aysan qaadin wax tallaabo ah.

Gorka, oo la hadlay warbaahinta Breitbart News Khamiistii, wuxuu sheegay in inkasta oo hoggaamiyahaasi la daba socday muddo dheer, aysan jirin wax weerar ah oo lagu qaaday.

“Maamulka Biden wuxuu muddo ku dhow laba sano la socday hoggaamiye Daacish ah oo Soomaaliya joogay, balse wax tallaabo ah lama qaadin si loo beegsado,” ayuu yiri Gorka mar uu la hadlayay Alex Marlow, tifaftiraha guud ee Breitbart News, intii lagu jiray barnaamijka The Alex Marlow Show ee ka baxa Salem Podcast Network.

Dhanka kale, dhowr toddobaad gudahood markii uu xafiiska la wareegay, madaxweyne Donald Trump wuxuu ansixiyay duqeyn lagu dilay hoggaamiyihii Daacish iyo 13 xubnood oo kale oo ka tirsanaa ururkaas.

Sida laga soo xigtay taliska AFRICOM ee Mareykanka, hoggaamiyahan Daacish ee la dilay, Axmed Maeleninine, wuxuu ahaa xubin muhiim ah oo ISIS u qaabilsanaa qorista dagaalyahanno, maalgelinta ururka, iyo abaabulka weerarro dibadda ah, oo ay ku jiraan kuwa lala damacsanaa gudaha Mareykanka iyo Yurub.

Faahfaahinta hawlgalkii duqeynta

Wareysiga uu bixiyay, Gorka wuxuu kaga hadlay faahfaahin cusub oo sir ah oo ku saabsan sida hawlgalku u dhacay.

“Waxaan galay xafiiska Oval Office anigoo la socda la-taliyaha amniga qaranka, Mike Waltz, waxaana sidnay dukumeenti hawlgaleed oo uu madaxweynuhu u saxiixi lahaa isagoo isticmaalaya qalinkiisa caanka ah ee Sharpie. Markii uu kor u eegay ayuu yiri, ‘Maxaad uga jeeddaa maamulka Biden wuxuu muddo laba sano ah la socday hoggaamiye ISIS ah oo Soomaaliya jooga, haddana wax tallaabo ah lama qaadin si loo dilo?’”

Wuxuu intaa ku daray in madaxweyne Trump isla markiiba bixiyay amarkii weerarka.

“Wuxuu naga sugay jawaab, markaasna wuxuu bixiyay amarkii hawlgalka. Markii la gaaray wax ka yar 30 saacadood kadib, waxaan ku sugnaa qolka Situation Room ee hoos yimaada West Wing,” ayuu yiri Gorka.

Hawlgalku wuxuu dhacay maalin Sabti ah, 1-da Febraayo 2025, saacadda bariga Mareykanka marka ay ahayd 9:48 subaxnimo. Gorka iyo kooxdiisa ayaa sugayay imaanshaha Mike Waltz.

“Bambaanooyinku waxay diyaar u ahaayeen in la rido 9:50 subaxnimo. Waxaan is weydiinaynay, ‘Halkee buu ku maqan yahay Mike? Halkee buu la-taliyaha amniga qaranka ku maqan yahay?’ 90 ilbiriqsi ka hor intaan la billaabin duqeynta, ayuu soo galay isagoo ka yimid kulan kale, markaas ayuu fariistay.”

Markii uu weerarku bilaabmay, shaashadaha waaweyn ee Situation Room ayaa soo bandhigay muuqaal toos ah oo laga helay goobta la beegsaday.

“Waxaan dareemnay sidii inaan daawanaynay Filimka 24, balse tani filim ma ahayn. Mar qura waxaan aragnay qaraxyo waaweyn oo ka dhacaya godad dhagax weyn ku dhex yaal—laakiin tani ma ahayn wax la farsameeyay,” ayuu yiri Gorka.

Gorka wuxuu sheegay in muuqaalkii duqeynta si degdeg ah loo shaaciyay muddo afar saacadood gudahood ah, waxaana la gaarsiiyay madaxweyne Trump oo ku sugnaa Mar-a-Lago.

“Madaxweyne Trump ayaa isla markiiba soo dhigay baraha bulshada, wuxuuna qoray fariin aad loo faafiyay oo ay ku qornaayeen erayadan waaweyn: ‘Haddii aad rabtaan inaad Mareykanka weerartaan, waanu idin heli doonaa, waana idin dili doonaa.’”

Gorka ayaa xusay in dhacdooyinka noocan oo kale ah ay qeyb ka yihiin shaqadiisa maalinlaha ah.

“Maalin caadi iima aha, balse tani waa waxa aan la kulmo maalin kasta,” ayuu yiri. “Mararka qaar waxaan is weydiiyaa, ‘Tani run miyaa mise waa riyo?’”