Shariif oo si adag uga hadlay weeraradii maanta gilgilay…

[Deeq A.]

Muqdisho (Caasimada Online) – Madaxweynihii hore ee Soomaaliya Shariif Sheekh Axmed ayaa war ka soo saaray dagaalladii kooxda Al-Shabaab ay maanta ku soo qaaday deegaano badan oo ka tirsan gobolka Shabeellaha Dhexe, iyadoo meelaha qaar ay kooxdu qabsatay deegaanada qaarna ay ka dhaceen dagaalo la isku riiqmay.

Sheekh Shariif ayaa sheegay in duullaanka Al-Shabaab uu hoosta ka xariiqayo sida looga gaabiyey la dagaalanka kooxda, isagoo madaxda dowladda Federaalka u soo jeedinayey inay diirrada saaraan halganka dalka looga xoreynayo Khawaarijta.

Al-Shabaab ayaa maanta weerarro toos ah ku qaaday deegaanada Al-Kowthar, Daarunicma, Ceel Cali Axmed, Cali Fooldheere, Ceelbaraf iyo tuulooyin kale oo ka tirsan gobolkaas, waana weerarkii ugu balaaraa oo hal maalin ay waayahaan waadeen Al-Shabaab.

“Waxaan boggaadinayaa Geesiyaasha xoogga dalka Soomaaliyeed iyo kuwa dadka deegaanka oo si nafhurnimo leh kaga hortagay duullaanka kooxda argagixisada Al-Shabaab ku soo qaaday deegaanno ka tirsan gobolka Shabeellada dhexe,” ayuu yiri Sheekh Shariif.

Shariifka ayaa tacsi u diray ciidamadii maanta ku shahiiday dagaalladii cuslaa ee dhacay, “Waxaan u tacsiyeynayaa qoysaska geesiyaasha ku shahiiday dagaalka xaqa ah, waxaana caafimaad deg deg ah u rajeynayaa kuwa dhaawacmay.”

Qoraalka Sheekh shariif ayaa intaas ku sii daray, “Duullaanka kooxda argagixisada ah wuxuu hoosta ka xariiqayaa sida looga gaabiyey la dagaalanka kooxaha caadeysatay daadinta dhiiga shacabka Soomaaliyeed.”

Madaxweyne hore Sharriif Sheekh Axmed, ayaa ku booriyey hay’adaha ammaanka inay laba jibaaraan dagaalka lagula jiro kooxaha nabadiidka ah.

“Waxaana madaxda dowladda Federaalka ah u soo jeedinayaa inay diirrada saaraan halganka loogu jiro dib u xoreynta dalka islamarkaana meel iska dhigaan siyaasadda ku dhisan kala qaybinta bulshada iyo xasarad abuurka,” ayuu qoraalkiisa ku soo gabagabeeyey Sheekh Shariif.

Dowladda Soomaaliya, oo maanta war kasoo saartay dagaaladii dhacay ayaa sheegtay in dhamaan degaanadii ay soo weerareen laga difaacay Al-Shabaab, isla markaana laga dilay in ka badan 130 horjoogayaal iyo maleeshiyaad isugu jira.