Maxaa ka dhalan kara hadalkii yaabka lahaa ee kasoo yeeray Xasan Sheekh?

[Deeq A.]

Muqdisho (Caasimada Online) – Madaxweynaha Soomaaliya Xasan Sheekh ayaa si yaab leh u weeraray mucaaridkiisa, oo maalmihii tegay huwiyay eedo kulul oo badi xaqiiqda dalka taalla xiriir la leh.

Kulan laba maalin socday oo ay Muqdisho ku yeesheen xubno mucaarid ah oo u badnaa xildhibaannada labada aqal ee baarlamaanka Soomaaliya ayaa si weyn loogu weeraray nidaamka madaxweyne Xasan Sheekh.

Kulankaas waxaa marti-geliyay xisbiga Himilo Qaran ee uu hoggaamiyo madaxweynihii hore ee Soomaaliya Shariif Sheekh Axmed. Xubnaha goobta ka hadlay waxay soo hadal qaadeen hanti boobka dalka ka socda, rejo xumada shacabka Soomaaliyeed, sida aan loo aqbali karin doorasho hal koox ay wadato iyo walaaca laga qabo jiritaanka dowladnimada Soomaaliya, iyaga oo sheegay in dhamaan guul-darooyinkaas uu mas’uul ka yahay madaxweyne Xasan Sheekh.

Xubnaha Muqdisho ku shiray ee mucaaradka ah waxay ku goodiyeen in haddii ay kooxda madaxweyne Xasan Sheekh ku adkeysato inay doorasho u gaar ah dalka ka qabtaan, inay iyaguna mid gaar ah qabsan doonaan, taas oo haddii ay dhacdo uga sii dari karta xaaladda dalka.

Madaxweyne Xasan Sheekh oo waayahan lasoo warinayay inuu aad u dhibsanayo farriimaha ka imaanaya dhanka mucaaradka ayaa sugi waayey inuu madal siyaasadeed ugu jawaabo mucaaradkiisa, wuxuuna taas bedelkeeda Isniintii farriin kasoo dhex diray goob isbitaal ah oo laga furayay magaalada Muqdisho.

Madaxweynaha waxa uu sheegay in dadka dhahaaya “khatar ayaa soo socota iyo xaaladda dalka ma fiicna” inay yihiin dad xanuusan, ayna u baahan yihiin la-talin caafimaad iyo daaweyn.

Waxay aheyd nuuc jawaab ah oo aan laga fileynin madaxweyne Xasan Sheekh ama qof jooga booskiisa oo kale. Markii eedeyn siyaasadeed lagu jeediyo waa inaad si siyaasi ah isku difaacda, laakiin hadda jawaabta uu bixiyay madaxweynuhu waxay dhali kartaa in isna si shakhsi ah caafimaadkiisa loo weeraro, oo meeshii fashilka dowladdiisa siyaasad lagu xiri lahaa caafimaadkiisa lala xiriirayo.

Ma ahan dhaqan iyo aragti u fiican dalka inay madaxdu ka boodaan xeerka siyaasiga ah oo ay isa shaqsiyad gaaraan. Madaxweyne Xasan Sheekh wuxuu haatan daah-furay in ereyadii maldahnaa laga saaro siyaasadda oo wixii la doono la is-dhihi karo. Hadda waxaa la eegaya sida ay mucaaradka uga jawaaban weerarkan siyaasad dhaafka ah.