Farqiga U Dhexeeya Awoodaha Guddoomiyaha Midowga Afrika iyo Guddoomiyaha Guddiga Midowga Afrika

[Deeq A.]

Guddoomiyaha Midowga Afrika waa hogaamiyaha siyaasadeed ee ururka, waxaana dooranaya madaxda waddamada xubnaha ka ah Midowga Afrika (AU) inta lagu guda jiro shir sanadeedka ururka.

Xilkaani waa mid iska beddela sanado kasta, waxaana qaban kara mid ka mid ah madaxda waddamada xubnaha ka ah AU.

Doorkiisa ugu weyn waa in uu matalo Midowga Afrika, hogaamiyo shirarka madaxda, iyo in uu dhiirrigeliyo mabaadi’da iyo siyaasadaha ururka.

Guddoomiyaha Guddiga Midowga Afrika (Chairperson of the African Union Commission) waa madaxa fulinta ee Guddiga Midowga Afrika, kaasoo ah hay’adda maamusha hawlaha maalinlaha ah ee ururka.

Waxaa lagu doortaa muddo afar sano ah, waxaana xilka haya qof si gaar ah ugu shaqeeya Midowga Afrika, halkii uu noqon lahaa madaxweyne waddan ka tirsan ururka.

Shaqadiisu waxay ku saabsan tahay hirgelinta siyaasadaha iyo go’aamada ay gaaraan madaxda Afrika, hoggaaminta howlaha guddiga, iyo matalaadda Midowga Afrika ee arrimaha caalamiga ah.

Sidaas darteed, Guddoomiyaha Midowga Afrika waa hoggaamiye siyaasi ah oo si ku-meel-gaar ah u hoggaamiya ururka, halka Guddoomiyaha Guddiga Midowga Afrika uu yahay maamulaha joogtada ah ee fulinta go’aannada ururka.

Doorashadii shalay ee 2025, waxaa Guddoomiyaha Midowga Afrika loo doortay Madaxweynaha Mauritania, Mohamed Ould Ghazouani, kaasoo xilkan qaban doona muddo hal sano ah. Doorashadiisa waxay timid xilli ay Afrika la daalaa-dhaceyso caqabado amni, siyaasadeed, iyo dhaqaale.

Dhanka kale, Maxamuud Cali Yuusuf, oo ka soo jeeda Djibouti, ayaa loo doortay Guddoomiyaha Guddiga Midowga Afrika.

Isagu wuxuu xilkan kala wareegayaa Moussa Faki Mahamat, oo Chad ka soo jeeday kuna jiray xilka tan iyo 2017.

Maxamuud Cali Yuusuf wuxuu horey u ahaa Wasiirka Arrimaha Dibadda ee Djibouti muddo dheer, waxaana la filayaa inuu door muhiim ah ka ciyaaro dib-u-habaynta Midowga Afrika iyo horumarinta xiriirka dibadda ee qaaradda.

Source: goobjoog.com