Guddiga doorashooyinka oo baaritaan ku bilaabay arrin xasaasi ah oo ay sameysay DF

[Deeq A.]

Muqdisho (Caasimada Online) – Guddiga doorashooyinka qaranka ayaa shaaciyay inay cabasho ka soo gaartay qaar ka mid ah ururrada siyaasadda, taasi oo walaac xooggan uu ka muujiyay guddiga.

Bayaan kasoo baxay guddiga ayaa lagu sheegay in guddiga uu baaris ku bilaabay arrintaan, islamarkaana ay xiriir la sameeyeen hay’adaha ay quseyso si loo gaaro natiijo.

“Guddiga waxa uu walaac xooggan ka muujinayaa cabasho kasoo gaartay ururrada siyaasadda, kuwaasi oo lagu carqaladeeyay kulan ay lahaayeen sida lagu baahiyay muuqaallo laga daawaday baraha bulshada iyo warbaahinta,” ayaa lagu yiri bayaanka guddiga doorashooyinka qaranka.

Guddiga ayaa caddeeyay in ururrada siyaasada ay xor u yihiin in ay qabsadaan kulamada ay uga arrinsanayaan doorashooyinka.

“Guddiga wuxuu u taagan yahay ilaalinta, hirgelinta iyo ku dhaqanka dastuurka JFS iyo xeerarka doorashooyinka qaranka, kuwaas oo damaanad qaadaya in ururrada siyaasadda ay qabsan karaan kulamo iyo wada-tashiyo si xor ah,” ayaa sidoo kale lagu yiri qoraalka.

Warka guddiga doorashooyinka ayaa imaanaya xili maalmo ka hor ciidamo ka tirsan nabad-sugida ay is hortaag ku sameeyeen kulan ay Muqdisho ku lahaayeen xisbiyada mucaaradka.

Kulankaasi ayaa waxaa ku sugnaa xildhibaan Daahir Amiin Jeesow iyo siyaasi Cabdullaahi, kuwaasi xiligaasi sheegay in laga hor istaagay kulamada ay qabsan lahaayeen.

Arrintaan ayaa imaaneysa xilli ay mucaaradka kalsooni darro ka muujiyeen hanaanka doorasho ee gadaal ka riixeyso dowladda Xasan Sheekh Maxamuud, kaasi oo si adag uga horyimaadeen madaxdii hore ee dalka.