Cirro oo shirka Dubai ka sheegay dalka ugu horreeya ee aqoonsan kara Somaliland

[Deeq A.]

Dubai (Caasimada Online) – Madaxweynaha Somaliland Cabdiraxmaan Cirro oo maanta ka qeyb-galay Shirka Dawladaha Adduunka ee ka furmay magaalada Dubai ee dalka Imaaraadka Carabta ayaa sheegay dal ay weyn uga sugayaan ictiraafka ay mudada badan raadinayeen.

Madaxweyne Cirro ayaa sheegay inuu rajeynayo in Mareykanku noqdo dalkii ugu horreeyay ee aqoonsada Somaliland, xilli dhawaan hadal-haynta arrintaan ay si weyn u faaftay, wallow su’aal la geliyay in qorshaha ugu jirto madaxweynaha cusub ee Mareykanka, Donald Trump.

“Waxaan rajaynaynaa in Mareykanku noqdo dalkii ugu horreeyay ee aqoonsada Somaliland,” ayuu yiri madaxweyne Cabdiraxmaan Cirro.

Sidoo kale wuxuu madaxweynaha Somaliland nasiib darro ku tilmaamay midowgii Somaliland gashay sannadkii 1960-kii, kaas oo uu sheegay in xilligaas looga gol lahaa in lagu raadiyo Midnimo Soomaaliyeed, balse Somaliland lasoo noqotay madax-bannaanideeda markale 1991-kii.

Hadal-jeedinta Cirro oo isugu dhafnayd mid uu ku iibgeeynayey qaddiyada Somaliland ee aqoonsi raadinta ayaa ku dheeraaday wixii u qabsoomay soddonkii sano ee la soo dhaafay, goobta ay ku taallo iyo muhiimadda ay u leedahay in ay hesho aqoonsi caalami ah.

Shirkan oo ay kasoo qeyb-galeen madax kala duwan oo ka socota daafaha adduunka, ayna qeyb ka yihiin wasiiro ka socda dowladda federaalka Soomaaliya ayaa waxa uu madaxweynaha Somaliland ka sheegay in ay yihiin dal madax-banaan oo xaq u leh inuu helo ictiraaf caalami ah, xilli adduunku u aqoonsan yahay maamul ka tirsan Soomaaliya.

“Somaliland waxay leedahay xeeb dhereran 850KM oo ku taalla gacanka Cadmeed. Magaalada Berbera oo ah dekedd istaraatijiya waxa dagaalkii qaboobaha adeegsaday quwadihii Ruushka iyo Maraykanka, waxaad halkaas ka garan gartaa muhiimadda ay leedahay,” ayuu yiri Cabdiraxmaan Cirro.

Waxa uu intaas kusii dareyna “Waxaan rajeynayaa in aannu dhammaystirno heshiiska isu gudbinta badeecadaha ee Itoobiya iyo Somaliland ka hor dhamaadka sannadkan aan ku jirno.”