Wasiirkii hore ee Kalluumeysiga Puntland oo bayaan ka soo saaray Dagaalka Calmiskaad baaqna u diray SSC-khaatumo

[Deeq A.]

Wasiirkii hore ee Wasaaradda Kalluumaysiga iyo Khayraadka Badda Puntland Dr. Rashid Maxamud Yusuf (ALKUD) ayaa bogaadiyey guullaha isdaba jooga ah ee ciidamada Difaaca Puntland ka soo hoyeen hawlgalka lagu ciribtirayo argagaxisada ku dhuumaaleysanaysa buuralayda Calmiskaad ee Gobolka Bari.

Wasiir hore Dr. Rashiid waxa uu uga tacsiyeeyay qoysaskoodii iyo Dowlada Puntland halyeeyadii ku shahiiday Hawlgalka Ciribtirka Argagixisada iyaga oo gudanaya waajibka ka saaran Difaaca Dalkooda, Wuxuuna Alle uga baryey in uu ka waraabiyo naxariistiisa janno, una boogadhayo halyeeyadii ku dhaawacmay.

𝐌𝐚𝐡𝐚𝐝𝐜𝐞𝐥𝐢𝐧𝐭𝐚 𝐃𝐚𝐝𝐚𝐚𝐥𝐤𝐚 𝐌𝐚𝐝𝐚𝐱𝐰𝐞𝐲𝐧𝐚𝐡𝐚 𝐢𝐲𝐨 𝐌𝐚𝐝𝐚𝐱𝐰𝐞𝐲𝐧𝐞 𝐤𝐮-𝐱𝐢𝐠𝐞𝐞𝐧𝐤𝐚 𝐞𝐞 𝐇𝐚𝐰𝐥𝐠𝐚𝐥𝐤𝐚 𝐥𝐚𝐠𝐮 𝐂𝐢𝐫𝐢𝐛𝐭𝐢𝐫𝐚𝐲𝐨 𝐀𝐫𝐠𝐚𝐠𝐢𝐱𝐢𝐬𝐚𝐝𝐝𝐚.

Dr. Rashid Maxamud Yusuf (ALKUD) ayaa sidoo kale Madaxweynaha Dowlada Puntland Dr. Said Abdulalahi Deni iyo ku-xigeenkiisa Mudane Ilyaas Cismaan Lugatoor uga mahadceliyey dadaalka aan kala joogsiga lahayn ee ay ku bixinayaan sidii deegaanada Puntland looga ciribtiri lahaa kooxda Argagixisadda ah ee Daacish.

Sidoo kale Wasiir hore  Dr. Rashid ayaa ugu baaqay bulshada reer Puntland in ay hiil iyo hoo la garab istaagaan ciidamada Puntland oo naftooda u huraya difaaca dadkooda, dalkooda, iyo diintooda, sidoo kalena Dowlada ku gacan siiyaan hormarinta adeegyadda Dowliga ah.

𝐆𝐚𝐫𝐚𝐛 𝐢𝐬𝐭𝐚𝐚𝐠𝐚 𝐌𝐚𝐚𝐦𝐮𝐥𝐤𝐚 𝐢𝐲𝐨 𝐒𝐡𝐚𝐜𝐚𝐛𝐤𝐚 𝐒𝐒𝐂-𝐊𝐡𝐚𝐚𝐭𝐮𝐦𝐨 𝐞𝐞 𝐂𝐢𝐢𝐝𝐚𝐧𝐤𝐚 𝐃𝐢𝐟𝐚𝐚𝐜𝐚 𝐃𝐨𝐰𝐥𝐚𝐝𝐚 𝐏𝐮𝐧𝐭𝐥𝐚𝐧𝐝.

Wasiirkii hore ee Kalluumaysiga Puntland  Dr. Rashid Maxamud Yusuf (ALKUD) ayaa ugu baaqay Shacabka iyo maamulka SSC-Khaatumo inay garab istaagaan Ciidanka Difaaca Puntland ee dagaalka kula jira kooxda Argagixisadda ah, ayna muujiyaan Midnimada iyo isku duubnida ka dhaxaysa Shacabka Walaalaha ah ee dhib iyo dheef wadaaga ah.

𝐊𝐡𝐢𝐥𝐚𝐚𝐟𝐤𝐚 𝐤𝐚𝐬𝐨𝐨 𝐜𝐮𝐬𝐛𝐨𝐨𝐧𝐚𝐚𝐝𝐚𝐲 𝐌𝐚𝐚𝐦𝐮𝐥𝐤𝐚 𝐒𝐒𝐂-𝐊𝐡𝐚𝐚𝐭𝐮𝐦𝐨.

Wasiir hore Dr. Rashid Maxamud Yusuf (ALKUD) ayaa ugu damayntii ugu baaqay gollayaasha kala duwan ee maamulka SSC-Khaatumo in wadahadal lagu xaliyo khilaafka ka dhex taagan gollaha Baarlamanka iyo gollaha Fullinta, loona baahan yahay in markasta Wadatashi iyo wadajir looga wada shaqeeyo arrimaha masiiriga ah, si looga hortago waxkasta oo lidi ku noqon Kara jiritaanka maamulka SSC-Khaatumo sidoo kalena dhaawici kara halgankii dheera ee ay bulshadu usoo gashay sidii maamulka SSC-Khaatumo Cagihiisa ugu istaagi lahaa.

Wasiirkii hore ee Kalluumaysiga Puntland Dr. Rashid (ALKUD) ayaa usoo jeediyey Isimada dhaqanka iyo Hal-doorka SSC-Khaatumo inay qaataan dowrkooda kaga aadan xalinta khilaafka soo cusboonaday ayna ka shaqeeyaan sidii loo xoojin lahaa wadajirka iyo jiritaanka SSC-Khaatumo.

PUNTLAND POST

The post Wasiirkii hore ee Kalluumeysiga Puntland oo bayaan ka soo saaray Dagaalka Calmiskaad baaqna u diray SSC-khaatumo appeared first on Puntland Post.