Halista Somaliland uga imaan karta dagaalka Puntland ka socda

[Deeq A.]

Hargeysa (Caasimada Online) – Xildhibaan Maxamed Abiib oo ka tirsan golaha wakiilada Somaliland oo qoraal soo saaray ayaa ka hadlay dagaalka ay Puntland ku qaaday kooxda Daacish ee haatan ka socda aagga buuraha Calmiskaad ee gobolka Bari.

Abiib ayaa marka hore garab istaag u muujiyay ciidanka Puntland, wuxuuna ku taliyay in meel kasta looga soo wada jeesto argagixisada.

Sidoo kale xildhibaanka ayaa usoo jeediyay Somaliland inay muujiso feejignaan, ayna ka hortagto firxadka maleeshiyaadka Daacish, si looga hortago halista kooxda ee Somaliland.

“Xukuumadda Jamhuuriyadda Somaliland waxaan u soo jeedinayaa in ay muujiso taxaddar dheeraad ah si aan firxadka argagixisadu gabbaad uga dhigan buuraha silsiladda Gollis iyo dhulka xadka ah ee Jamhuuriyadda Somaliland, waayo balaayo madax la qabto ayay leedahay ee minjo la qabto maleh.” ayuu qoraalkiisa ku yiri Xildhibaan Maxamed Abiib.

Warsaxaafadeedka ayaa u qornaa sidatan;-

𝐓𝐚𝐚𝐠𝐞𝐞𝐫𝐚𝐝𝐚 𝐡𝐚𝐰𝐥𝐠𝐚𝐥𝐤𝐚 𝐜𝐢𝐝𝐡𝐢𝐛𝐭𝐢𝐫𝐤𝐚 𝐀𝐫𝐠𝐚𝐠𝐢𝐱𝐢𝐬𝐚𝐝𝐚 𝐞𝐞 𝐏𝐮𝐧𝐭𝐥𝐚𝐧𝐝

Waxaan taageero iyo garab istaag u muujinayaa ciidamada dowladda Puntland ee buuraha Calmiskaat dagaalka kula jira argagixisada caalamiga ah ee Daacish. Argagixisadu arxan iyo ehel toonna ma gasho, inama kala jecla oo iyagu waxay inoo arkaan cadow, iyagana waa in aynu u aqoonsanaa cadow.

Xukuumadda Jamhuuriyadda Somaliland waxaan u soo jeedinayaa in ay muujiso taxaddar dheeraad ah si aan firxadka argagixisadu gabbaad uga dhigan buuraha silsiladda Gollis iyo dhulka xadka ah ee Jamhuuriyadda Somaliland, waayo balaayo madax la qabto ayay leedahay ee minjo la qabto maleh.

Waqtigan adag, qof walba oo Soomaali ah waxa waajib ku ah in uu taageero walaalaha Puntland, kuwaas oo ku jira jihaad xaq ah oo ay ku difaacayaan diinteenna suubban, sidoo kalena ku ilaalinayaan sharafka dalkooda iyo dadkooda.

Guulaysta walaalayaal, waxaan taaganahay garabkiina