Howlgallada Al-Shabaab ee Muqdisho oo midkiiba ku kaco $80,000 iyo cidda bixisa

[Deeq A.]

Muqdisho (Caasimada Online) – Weerarada qaraxyada ah ee Al-Shabaab ay ka fuliyaan Muqdisho ayaa ku kaca ilaa $80,000 halkii hawlgalba, iyadoo ganacsatada Soomaaliyeed, iyagoo aan ogaal u ahayn, ay gacan ka geysanayaan maalgelinta dhaq-dhaqaaqyada kooxda, waxaa sidaas shaaciyay Taliyaha Booliiska Gobolka Banaadir, Macallin Mahdi.

Mahdi, oo ka hadlay shirka xeer-ilaalinta qaranka ee Muqdisho, ayaa shaaca ka qaaday in Al-Shabaab ay inta badan lacagaha ku baxa hawlgalladooda ay ka helaan iyagoo lacag ku qasba milkiilayaasha ganacsiga ee ku sugan goobaha ganacsi ee muhiimka ah, sida Suuqa Bakaaraha, Suuq Bacaad iyo Xamar Weyne.

Lacagtan ayaa loo adeegsadaa maalgelinta sameynta iyo daabulidda qaraxyada, oo inta badan Muqdisho laga soo geliyo gobollada Shabeellaha Hoose iyo Jubbooyinka.

“Soo-gelinta qaraxyadan ee magaalada waxay u baahan tahay taageero maaliyadeed oo xooggan,” ayuu yiri Mahdi. “Hawlgal kastaa wuxuu ku lug leeyahay lacag u dhaxaysa $10,000 ilaa $80,000, gaadiidka wada bambooyinka waxay maraaan ugu yaraan sagaal qof oo dhex-dhexaadiyayaal ah ka hor inta aysan gaarin bartilmaameedkooda,” ayuu yiri Macallin Mahdi.

Mahdi wuxuu xusay in ganacsatada badani ay u hoggaansamaan dalabaadka lacagta qasabka ah cabsi ay ka qabaan aargoosi darteed, laakiin wuxuu ka digay in lacagaha ay bixiyaan ay si toos ah u hurinayaan weerarrada waxyeelleeya dadka rayidka ah ee aan waxba galabsan ee Soomaaliyeed.

Wuxuu ugu baaqay garsoorka inuu sameeyo xarumo gaar ah oo lagu hayo dadka ganacsatada ah ee lagu helo dambi ah inay maaliyad ku taageeraan ururrada argagixisada, sida Al-Shabaab iyo Daacish.

“La’aanteed cawaaqib sharci oo adag, shabakadahan maaliyadeed waxay sii wadi doonaan inay awood siiyaan weerarrada dhimashada ah,” ayuu raaciyay.

Khubarada dhanka ammaanka ayaa sheegaya in ku tiirsanaanta Al-Shabaab ee ku aaddan lacagaha ay ku qasbaan dadka ay muddo dheer ahayd udub dhexaadla istiraatiijiyadooda maaliyadeed.

Dadaallada lagu carqaladaynayo shabakadaha maaliyadeed ee kooxda ayaa sii xoogaysanayay sannadihii la soo dhaafay, iyadoo mas’uuliyiinta Soomaalidu ay howlgalo ka sameynayeen ganacsiyada looga shakisan yahay inay fududeynayaan hawlgallada dagaalyahannada.

Dad badan ayaa aaminsan in goynta marin u helidda kooxda ee lacagaha ay muhiim u tahay ilaalinta xasilloonida muddada dheer ee Muqdisho iyo qaybo kale oo ka mid ah Soomaaliya.