DEG DEG: Xasan Sheekh oo war culus ka soo saaray dagaalka ay Puntland ku qaaday Daacish

[Deeq A.]

Muqdisho (Caasimada Online) –Madaxweynaha Soomaaliya Xasan Sheekh Maxamuud ayaa sii xoojiyay baaqa Golaha Xukuumadda Federaalka Soomaaliya ee ku aaddan howlgalka ka dhanka ah argagixisada Daacish ee ku dhuumaaleysanaysa buuraha Calmiskaad ee gobolka Bari.

Madaxweynaha ayaa bogaadiyey guulaha taariikhiga ah ee ay soo hooyeen ciidanka iyo shacabka Dowlad Goboleedka Puntland.

Madaxweynaha ayaa faray Xukuumadda in ay dardargeliso hirgelinta go’aanka taageerada geesiyaasha Soomaaliyeed ee u istaagay xoreynta deegaannada ay argagixisada Daacish kaga sugan yihiin buuraleyda gobolka Bari.

Sidoo kale Xasan Sheekh ayaa xusay in dowladda iyo shacabka Soomaaliyeed oo isku duuban ay ka adkaanayaan argagixisada isa soo baheysatay, islamarkaana ay ka xoreynayaan taako kasta oo ka mid ah dhulka Soomaaliyeed.

Ugu danbayntii Madaxweynaha ayaa adkeeyay in Dowladda Federaalka ay ka go’an tahay la dagaallanka iyo ciribtirka argagixisada caalamiga.

Xasan Sheekh ayaa cadeeyey in la xoojinayo awoodda ciidanka, korna loo qaadayo daryeelka caafimaad ee halyeeyada ku dhaawacmay xoreynta deegaannada lagu baacsanayo argagixisada.

Golaha Wasiirrada ayaa shirkii Khamiislaha ahaa ee maanta ku bogaadiyey ciidamada Puntland ee dagaalka kula jira Argagixisada Daacish.

Horay Ra’iisul Wasaare Xamsa ayaa u cadeeyey in dowladda federaalka ay Puntland ku garab taagan tahay dagaalka Daacish, inkastoo siyaasiyiinta hoggamisa Puntland ay si cad u sheegeen in dowladda federaalka aysan ka helin wax garab istaag ah.