Xildhibaan Cagaweyne oo u jawaabay Qeybdiid: Intaa taqaanay wey dhaaftay

[Deeq A.]

Muqdisho (Caasimada Online) – Xildhibaan Cabdiraxmaan Cagaweyne ayaa si adag ugu jawaabay Senator Cabdi Qaybdiid oo ka horyimid hannaanka doorashada ee qof iyo cod, kaas oo ay dowladda federaalka Soomaaliya soo jeedisay in laga dhaqan-geliyo Soomaaliya sannadka 2026-ka.

Cagaweyne ayaa wax la’la yaabo ku tilmaamay in Qeybdiid oo gacantiisa ku ansixiyay hanaankan uu eedeeyo qof kale, “intaa taqaaney waa dhaaftay dalkana waa ka gudbay xiligii afduubka loo haysan jiray,” ayuu xildhibaanka ku yiri qoraal uu soo saaray, kaas oo ugu jawaabay Qeybdiid.

“Waa nasiib darro weyn in Senator-ka maanta dhaho dalka iyo qaranimada ayaan u baqay, iyadoo dalka maanta uu ku talaabsaday wadadii horumarka iyo amniga, una jiheystay taariikh iyo waa cusub, ayna dadka Soomaaliyeed oo mudo 56 sano kadib ay dooranayaan hogaankii xukumi lahaa,” ayuu yiri Cagaweyne.

Hoos ka aqriso qoraalka oo dhameystiran;

Waxaa nasiib darro ah in siyaasadii dalka lagu jaangooyay maslaxado gaar ah oo hadii la waayo ay aflagaado ku xigto.

Dalka waxaa loo doortay Madaxweyne Hassan Sheikh Mohamud dastuurka dalkana wuxuu awood usiinayaa in qorshayaashii dib u doorashadisa ku balan qaaday uu fuliyo waxaana ugu horeysay in dastuurka dalka la dhameystiro doorasho qof iyo codna dalka kadhacdo labadii qodob oo ugu muhimsanaa maanta waxay marayaan meel gabagaba ah.

Dalka wuxuu kujiraa gacan aamin ah waxaa madax ka ah Madaxweyne 40 kii sano laso dhaafay dalka aan meelna ka aadin laba marna soo hogaamiyay dalka mana loo baqaayo maanta maalin uu ka fiicanyahayna masoo marin, dalka wuxuu ka guuray mugdigii mudada dheer uu kujiray wuxuuna u guuray iftiinka caalamka kasocda ee dimuqraadiyada.

Senator Abdi Qeybdiid waxaa leeyahay wixii aad adiga gacantada ku ansixisay haku eedeyn qofkale intaa taqaaneyna waa dhaaftay dalkana waa ka gudbay xiligii afduubka loo heesanjiray.

Ugu danbeyn Senatorka wuxuu u soo joogey dalkaan oo aan wax nidaam ah ka jirin oo dadku si sharci daro ah loo dhacaayay loona dilaayay xoolahooda iyo xurmadoodana lagu xadgudbayay gaajo iyo macluulna ay kajirtay dalka amni darro xoogana ay hareysay.

Waa nasiib darro weyn in Senatorka maanta dhaho dalka iyo qaranimada ayaan u baqay iyadoo dalka maanta uu ku tilaabsaday wadadii horumarka, barwaaqada iyo amniga una jiheestay taariikh iyo waa cusub dastuurkii mudada dheer qabyada ahaa oo la dhameystirayo iyo dadka Soomaaliyeed oo mudo 56 sano kadib ay dooranayaan hogaankii xukumi lahaa!!!