Somaliland oo si kulul u diiday warkii ka soo baxay Mareykanka

[Deeq A.]

Hargeysa (Caasimada Online) – Somaliland ayaa si kulul u diiday warbixin ka soo baxday Taliska Ciidammada Maraykanka ee Afrika (AFRICOM) oo sheegaysay in duqeymo cirka ah oo dhawaan lala beegsaday maleeshiyada Daacish ay ka dhaceen Buuraha Golis ee ku yaalla Somaliland.

Saraakiisha ayaa caddeeyay in weerarradaas laga fuliyay Buuraha Galgala, oo ah deegaan hoos taga maamul-goboleedka Puntland ee Soomaaliya, balse aanay ka dhicin gudaha dhulka Somaliland.

War-saxaafadeed kasoo baxay Wasaaradda Gaashaandhigga Somaliland Isniinta maanta ah, ayaa lagu diiday goobta uu AFRICOM tilmaamay in duqeymuhu ka dhaceen, iyadoo lagu adkeeyay in aanu jirin wax hawlgal ah oo ay ciidammada Maraykanku ka sameeyeen gudaha dhulka Somaliland.

“Si ka duwan hadallada loo tiiriyay Xoghayaha Gaashaandhigga Maraykanka, Peter Hegseth, duqeymaha cirka ah ee laga hadlayo kama dhicin, mana aanay saamayn Buuraha Golis ee ku yaalla gudaha dhulka Jamhuuriyadda Somaliland,” ayay tiri wasaaraddu. “Balse, hawlgalladan waxaa laga fuliyay Buuraha Galgala, oo ku yaalla gudaha Puntland, oo ah qayb ka mid ah dhulka Soomaaliya.”

Murankan ayaa tusaale u ah xasaasiyadda ka taagan xuduudaha dhuleed ee waqooyiga Soomaaliya.

Silsiladda Buuraha Golis, oo dhex marta Somaliland iyo Puntland, ayaa inta badan loo adeegsadaa eraybixin juquraafi ahaan ah oo guud, balse saraakiisha Somaliland ayaa ku adkaysanaya in Buuraha Galgala, oo u dhow magaalada Galgala ee gobolka Bari ee Puntland, ay gebi ahaanba ka baxsan yihiin dhulkooda.

Saraakiisha Somaliland ayaa ku doodaya in ilaalinta caddaynta xuduudaheedu ay lama huraan u tahay dhowrista madaxbannaanida dhulkeeda iyo dadaalka ay ugu jirto helidda aqoonsi caalami ah, sida ay hadalka u dhigeen.

Somaliland, oo iskeed isugu dhawaaqday dawlad madax-bannaan tan iyo sannadkii 1991-kii, ayaa leh dawlad, ciidan, iyo nidaam maamul oo u gaar ah. In kasta oo aanay haysan aqoonsi caalami ah, haddana waxa ay ka mid tahay gobollada ugu xasilloon Geeska Afrika.

War-saxaafadeedka ayaa sidoo kale lagu muujiyay iskaashiga muddada dheer soo jiray ee Somaliland la leedahay Maraykanka dhinacyada la dagaallanka argagixisada iyo sugidda amniga gobolka.

“Waxaan fursaddan uga faa’iidaysanaynaa inaan dib u xaqiijinno sida ay nooga go’an tahay ilaalinta nabadda iyo xasilloonida gobolka,” ayaa lagu yiri warka.

“Somaliland waxa ay weli tahay saaxiib la isku hallayn karo oo safka hore kaga jira dagaalka ka dhanka ah argagixisada iyo xagjirnimada, waxaanan sii wadaynaa inaan la shaqayno beesha caalamka, oo uu Maraykanku ka mid yahay, si kor loogu qaado xasilloonida Geeska Afrika.”