Xukuumadda Somaliland oo beenisay in uu Maraykanku wax duqaymo ah ka geystay Buuralayda Somaliland.

[Deeq A.]

Wasaaradda Gaashaandhiga ee Somaliland ayaa beenisay in uu Maraykanku wax duqaymo ah ka geystay Buuralayda Somaliland. Wasaaradda ayaa sheegtay in duqaynta uu Maraykanku la eegtay kooxaha xagjirka ah ay ka dhacday Buurlayda Galgala ee dhinaca Putland balse aanay ka dhicin Buurlayda Golis ee Somaliland, iyada oo Wasaaraddu intaa sii raacisay in  hadalka Xoghayaha Gaashaandhiga ee Maraykanku  uu ku koobnaa dhinaca Putland oo keliya.

Somaliland aya xustay in ay tahay saaxiib dhow oo beesha Caalamka kala shaqeeya la dagaallanka argagaxisada iyo xagjirnimada isla markaana uu dhulkeedu ka nadiif yahay kooxaha argagaxisada ah.

Hadalka Xoghayaha Gaashaandhiga ayaa ah mid muujinayey in ay duqaymo ka geysteen buuraha Golis oo Somaliland qayb ka tahay isaga oo aan si gaara u carrabaabin goobta ay Golis ka tahay taas oo keentay in ay Somaliland dhinaceeda caddayso.

Duqaymaha dhacay 24 kii saacaodod ee la soo dhaafay ayaa laga fuliyey buuraha Calmiskeed ee gobolka Bari sida uu sheegay Taliyaha Ciidanka Daraawish Putland  Aadan Cabdi Xaashi. Waxana amarka bixiyey madaxweynaha Maraykanka Donald Trump.

Source