DF oo u digtay hay’adaha maxaliga iyo kuwa caalamiga ah kadib arrin soo korortay

[Deeq A.]

Muqdisho (Caasimada Online) – Wasaaradda arrimaha gudaha, federaalka Iyo dib-u-heshisiinta Soomaaliya ayaa digniin culus u dirtay dhamamaan hay’adaha maxalliga ah iyo kuwa caalamiga ah ee ka howl-gala Soomaaliya, si aysan ula shaqeyn Al-Shabaab ama wax macaamil ah ula yeelan.

Bayaan kasoo baxay wasaaradda ayaa lagu sheegay in hay’addahan aysan la macaamili karin, ayna dhaqaale u yaboohi karin, islamarkaana aysan u hoggaansamin ammarrada uga yimaada Al-Shabaab, xilli ay soo baxayaan warar hoose oo sheegaya in kooxda ay bilowday qorshe ay baad uga dalbaneyso hay’addaha qaar.

“Hay’addii ama shakhsigii ku lug yeesha howlahan waxaa laga qaadayaa tallaabo waafaqsan xeerarka waddanka, sidoo kalena wasaaradda arrimaha gudaha waxay ka qaadeysa tallaabooyin dhowr ah oo kamid tahay in laga laabto shahaadada ruqsadsiinta hay’addii ku lug yeelata dambiyadan,” ayaa lagu yiri nuxurka bayaanka kasoo baxay wasaaradda arrimaha gudaha.

Sidoo kale waxay wasaaradda shaacisay in hay’addii ay ku cadaato in ay ku jiraan xubno kamid ah Al-Shabaab iyo Daacish ama wakiil uga noqda hay’adood ay wasaaraddu si toos ugala noqoneyso shahaadadii ruqsadda, iyadoo si toos ah ugu gudbin doonta laamaha amniga iyo garsoorka.

“Sidaas darteed hay’adaha maxaliga ah iyo kuwa caalamiga ah waxaa lagu adkeynayaa in ay u hoggaansamaan digiintan kor ku xusan,” ayaa ugu dambeyntiina lagu yiri qoraalka dowladda.

Dowladda federaalka Soomaaliya ayaa horey usoo saartay digniino la xiriira la-macaamilka iyo in loo hoggaansamo awaamirta Al-Shabaab, iyada oo horey ugu goodisay in tallaabo adag laga qaadi doono cidii lagu helo arrimahaasi.